,,ჩვენ ვნახეთ, რომ ჩვენი პრეზიდენტი არის ჭეშმარიტად "ნაციონალური" პრეზიდენტი”, - ასე გამოეხმაურა პრემიერი ირაკლი ღარიბაშვილი პრეზიდენტის შეწყალების აქტს.
ღარიბაშვილი იმედოვნებს, რომ მარგველაშვილი სააკაშვილს, ახალაიას, მერაბიშვილს და სხვა "კეთილ ადამიანებსაც" შეიწყალებს.
"ჩვენ ვნახეთ, რომ ჩვენი პრეზიდენტი არის ჭეშმარიტად "ნაციონალური" პრეზიდენტი. გუშინ მან შეიწყალა ერთ-ერთი მსჯავრდებული, ბატონი ბობოხიძე, რომელიც ჩვენმა პროკურატურამ დააკავა. მას მიესაჯა პატიმრობა, პრეზიდენტმა კი შეიწყალა. ძალიან კარგია, რომ ასეთი კეთილშობილი პრეზიდენტი გვყავს. იმედი მაქვს, რომ ის სააკაშვილს, ბაჩო ახალაიას, ვანო მერაბიშვილს და სხვა "კეთილ ადამიანებსაც" შეიწყალებს, - განხადა ღარიბაშვილმა ჟურნალისტებთან საუბრისას.
პრეზიდენტმა გიორგი მარგველაშვილმა ,,ნაციონალური მოძრაობის” დეპუტატ აკაკი ბობოხიძის ძმა ლევან ბობოხიძე და მასთან ერთად დაკავებული ხონის ყოფილი გამგებელი ზურაბ ჯიბუხაია შეიწყალა. მათ ბრალად სახელმწიფო ქონების გაფლანგვა ედებოდათ და 3 წლითა და 6 თვით პატიმრობა ჰქონდათ მისჯილი.
შეგახსენებთ, რომ პრეზიდენტმა გუშინ სულ 98 პატიმარი შეიწყალა.
