საქართველოს პარლამენტის თავმჯდომარემ დავით უსუფაშვილმა, პარლამენტის წევრებმა თამაზ მეჭიაურმა, ნოდარ ებანოიძემ და ლევან ბეჟაშვილმა გერმანიის უმაღლესი აუდიტორული ორგანოს პრეზიდენტთან კაი შელლერთან შეხვედრა გამართეს.
პარალამენტის ცნობით, მხარეებმა ევროკავშირის ქვეყნებში აუდიტის სამსახურის მუშაობის სპეციფიკაზე, აუდიტის სამსახურთან მიმართებაში პარლამენტის უფლებამოსილებაზე და იმ საკანონმდებლო ჩარჩოებზე იმსჯელეს, რომელიც აუდიტის სამსახურის მოქმედების არეალსა და დამოუკიდებლობის ხარისხს განსაზღვრავს. ისაუბრეს საქართველოს სახელმწიფო აუდიტის სამსახურის მიღწევებისა და მის წინაშე მდგარი გამოწვევების შესახებაც. შეხვედრაზე ხასგასმით აღნიშნეს, რომ ევროპის ქვეყნების აუდიტის სამსახურების მხრიდან, საქართველოს აუდიტის სამსახურის გამოცდილების გაზიარება და საჯარო სამსახურების დაძმობილების პროგრამა (Twinning) განსაკუთრებით მნიშვნელოვანია.
გერმანიის უმაღლესი აუდიტორული ორგანოს პრეზიდენტის განცხადებით, ევროპას აღმოსავლეთში სტაბილური და ძლიერი პარტნიორი სჭირდება, რომელსაც საზოგადოებრივი სახსრების ადმინისტრირებაში მაღალი სტანდარტები ექნება. კაი შელლერმა საქართველოს პარლამენტის წევრები გერმანიაში მიიწვია.
საქართველოს პარლამენტის თავმჯდომარის თქმით, საჭიროა სახელმწიფო აუდიტის სამსახურის მნიშვნელობის გააზრება და არცერთი პოლიტიკური ძალა არ უნდა ახდენდეს აუდიტის სამსახურის დასკვნის შინაარსზე გავლენას. დავით უსუფაშილის განცხადებით, აუდიტის სამსახურის დასკვნის გამოყენება და მასზე დაყრდნობა ჯანსაღი პოლიტიკის ნაწილია.
შეხვედრის დასრულების შემდეგ, გერმანიის უმაღლესი აუდიტორული ორგანოს პრეზიდენტმა მასმედიასთან კომენტარი გააკეთა და სახელმწიფო აუდიტის სამსახურისა და Twinning ის პროგრამის მნიშვნელობაზე ისაუბრა. „ჩვენ ვისაუბრეთ, თუ რამდენად მნიშვნელოვანია გარეფინანსური კონტროლის საკითხი, ზოგადად ფინანსური კონტროლის საკითხი და ამ თვალსაზრისით რა მნიშვნელოვანი როლი ენიჭება სახელმწიფო აუდიტის სამსახურს-რომ ეს გახლავთ ერთ-ერთი საუკეთესო ინსტრუმენტი იმისთვის, რომ პარლამენტმა მოახდინოს ბიუჯეტის ხარჯვის გაკონტროლება. ძალიან მნიშვნელოვანია ეს თანამშრომლობა ამ ორ ინსტიტუციას შორის და ჩვენი მიზანიც ის გახლავთ, რომ მოხდეს ქვეყნის ინსტიტუციური გაძლიერება, რადგან ჩვენ გვსურს, რომ საქართველო იყოს სტაბილური, ძლიერი სახელმწიფო, ხოლო სტაბილური და ძლიერი სახელმწიფოსთვის ძალიან მნიშვნელოვანია ასეთი ძლიერი ინსტიტუციები. მიმდინარეობს Twinning-ის პროექტი, რომელსაც ახორციელებს, ერთის მხრივ, გერმანიის უმაღლესი აუდიტორული ორგანო, მეორეს მხრივ, პოლონური უმაღლესი აუდიტორული ორგანო, რომელიც თანაბარ საფუძვლებზე თანამშრომლობს საქართველოს სახელმწიფო აუდიტის სამსახურთან. ეს არის ძალიან მნიშვნელოვანი, რომ სწორედ ამ პროექტის ფარგლებში ხდება ექსპერტების გამოგზავნა და სწორედ ამ ექსპერტების მეშვეობით ხდება ცოდნისა და გამოცდილების გაზიარება ქართული მხარისათვის. ჩვენთვის ძალიან მნიშვნელოვანია ურთიერთობა სახელმწიფო აუდიტის სამსახურთან“- განაცხადა კაი შელლერმა.
საჯარო სამსახურების დაძმობილების პროგრამა (Twinning) ევროკავშირის წევრ და მიმღებ ქვეყნებს შორის თანამშრომლობის ინსტრუმენტია. ამჟამად, პროგრამის ფარგლებში პროექტი - „საქართველოს სახელმწიფო აუდიტის სამსახურის ინსტიტუციური გაძლიერება“ მიმდინარეობს, რომელსაც გერმანულ-პოლონური კონსორციუმი გერმანიის უმაღლესი აუდიტორული ორგანოს ხელმძღვანელობით და პოლონეთის უმაღლესი აუდიტორული სამსახურის მხარდაჭერით საქართველოს სახელმწიფო აუდიტის სამსახურთან თანამშრომლობით ახორციელებს.
