"ერთი და იგივე სიმღერას მღერიან საქართველოს ხელისუფლება და რუსეთის ხელისუფლება,"- ამის შესახებ, ,,ნაცმოძრაობის” წევრმა აკაკი მინაშვილმა შერიგებისა და სამოქალაქო თანასწორობის საკითხებში სახელმწიფო მინისტრის პაატა ზაქარეიშვილის განცხადების შეფასებისას განაცხადა.
მინაშვილი მიიჩნევს, რომ ზაქარეიშვილის განცხადებები ანტისახელმწიფოებრივია.
"ზაქარეიშვილის მთავარი მიმართულება არგუმენტაციის ის კი არის, რომ როგორმე პრინციპული პოზიცია დაიკავოს რუსეთის წინააღმდეგ, არამედ მისი მთავარი არგუმენტაცია არის ის, რომ თითქოს ეს ბანერი დაიდგა ოკუპირებულ ტერიტორიაზე, ყოფილი სამხრეთ ოსეთის ტერიტორიაზე ანუ ის გარკვეულწილად გულისხმობს იმას, რომ ამ ბანერის დადგმა მოხდა ლეგალურად. ეს მან ათასჯერ გაიმეორა და სწორედ ეს თქვა კარასინმა ჟენევაში. -განაცხადა აკაკი მინაშვილმა.
შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილის განცხადებით, რუსი ოკუპანტების მიერ ე.წ. საზღვარი არ გადმოწეულა. როგორც მთავრობის სხდომის შემდეგ ზაქარეიშვილმა ჟურნალისტებთან განაცხადა, ყველაფერი კანონის ფარგლებში ხდება.
ადმინისტრაციული საზღვრების გარეთ არ გადმოსულა არც ერთი ბანერი, არც ერთი მავთუხლართი.
,,ყველა ბანერი, ყველა მავთულხლართი, რაც კი აღმართულა, დამდგარა, გადაწეულა, გადმოწეულა, ეს ხორციელდება ოკუპირებული ტერიტორიის ფარგლებში, ანუ იმ კანონის ფარგლებში, რომელიც "ნაციონალური მოძრაობის" დროს დადგინდა. ანუ, ოკუპირებული ტერიტორიის გარეთ, ყოფილი სამხრეთ ოსეთის ავტონომიური ოლქის გარეთ, ადმინისტრაციული საზღვრების გარეთ არ გადმოსულა არც ერთი ბანერი, არც ერთი მავთუხლართი. ბაქო-სუფსის ნაწილი ახლა არ მოქცეულა იქ. ყოველთვის იყო, როგორც კი გაყვანილი იქნა ბაქო- სუფსის მილსადენი, გაყვანილი იქნა იმ ტერიტორიაზე, რომელიც ითვლებოდა ყოფილი სახმრეთ ოსეთის ავტონომიური ოლქის ტერიტორიად. 2008 წლამდე აკონტროლებდა საქართველოს მხარე, შემდეგ უკვე საოკუპაციო ჯარები. ეს, დაახლოებით, ისეთი რაღაცაა, წარწერა რომ გაჩნდეს კარზე, რომ იქ ცხოვრობს ზაქარეიშვილი, რომელიც ყოველთვის ცხოვრობდა. ამ ბანერმა საქართველოში შექმნა გარკვეული რაღაც ვნებათაღელვა იმაზე, რაც უკვე დიდი ხანია არსებობს, რაც ახლა ხდება, ეს ხდება 2008 წლის აგვისტოდან",-განაცხადა პაატა ზაქარეიშვილმა.
