ამ ეტაპზე საბერძნეთიდან საქართველოს მოქალაქეების სამშობლოში მასობრივად დაბრუნების მოლოდინი, სამწუხაროდ თუ საბედნიეროდ, არ არსებობს, - ამის შესახებ დიასპორის საკითხებში სახელმწიფო მინისტრმა გელა დუმბაძემ ჟურნალისტებთან მთავრობის სხდომის დაწყებამდე განაცხადა.
მინისტრის ინფორმაციით, ხვალ, მისი პირველი მოადგილე ზაალ სარაჯიშვილი თესალონიკსა და ათენში ჩავა, სადაც დიასპორული ორგანიზაციების წარმომადგენლებთან შეხვედრებს გამართავს.
რაც შეეხება, საჭიროების შემთხვევაში მათი დახმარების საკითხს, დუმბაძე აცხადებს, რომ ირაკლი ღარიბაშვილის გუნდმა არაერთხელ დაამტკიცა მობილიზების საკმაოდ მაღალი უნარი.
,,ჩვენი უწყება საქმის კურსშია იმ პეტიციასთან დაკავშირებით, რომელიც საბერძნეთში მყოფმა ემიგრანტებმა საქართველოს მთავრობის მისამართით შეიმუშავეს. უყურადღებოდ არცერთი მათგანი არ დარჩება” - დასძინა მინისტრმა.
