საქართველში ამერიკის შეერთებული შტატების ელჩის რიჩარდ ნორლანდის შეფასებით, საოკუპავიო ხაზის გასწვრივ ე.წ. სახელმწიფო საზღვრის აღმნიშვნელი ბანერების აღმართვა რუსეთის მხრიდან პროვოკაციის მცდელობაა. აღმიშნული საკითხის კომენტირებისას ელჩმა ჟურნალისტებთან განაცხადა ასევე, რომ მომხდარი ფაქტი საქართველოს ტერიტორიის მიტაცებაა და ის საერთაშორისო სამართლის ნორმებს უხეშად არღვევს.
„მდგომარეობა იგივეა - გრძელდება ის, რაც აქამდე ხდებოდა. მეორე მხრივ, ეს არის საქართველოს დამცირებისა და პროვოკაციების მცდელობა. აშშ-სა და საერთაშორისო თანამეგობრობის პოზიცია კვლავ უცვლელი რჩება. ჩვენ განვაგრძობთ საქართველოს მხარდაჭერას და ღიად ვაცხადებთ, რომ ეს საქართველოს სუვერენული ტერიტორიაა“, - განაცხადა რიჩარდ ნორლანდმა.
გორის რაიონის სოფელ წითელუბნისა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, 10 ივლისს, რუსეთის საოკუპაციო ძალების მიერ, ე.წ. ,,საზღვრის“ აღმნიშვნელი ბანერები უკანონოდ აღიმართა. ოკუპირებულ ტერიტორიაზე მოექცა ასევე „ბაქო-სუფსას“ მილსადენის გარკვეული სეგმენტი.
