ევროჯგუფმა ათენისგან შეთავაზებათა ახალი პაკეტი მიიღო. დოკომენტი ყველა იმ სტრუქტურულ რეფორმას მოიცავს, რომლის გატარების პირობასაც ციპრასის მთავრობა დებს. რეფორმების გატარების შემთხვევაში ბიუჯეტი დამატებით 12 მილიარდი ევროთი შეივსება. ამისათვის საბერძნეთის მთავრობა მზადაა გადასახადები გაზარდოს, თავდაცვის ხარჯები შეამციროს და სახელმწიფო მფლობელობაში არსებული ობიექტების, მათ შორის, აეროპორტებისა და მსხვილი საზღვაო პორტების პრივატიზაცია დაიწყოს. ამასთან, საბერძნეთი საერთაშორისო კრედიტორებთან არსებული ვალდებულებების შესასრულებლად, ევროკავშირისგან მომავალი სამი წლის განმავლობაში 53 ნახევარ მილიარდ ევროს ითხოვს. საბერძნეთის საკითხს ხვალ ევროზონის წევრი ქვეყნების ფინანსთა მინისტრები განიხილავენ, 12 ივლისს კი საბერძნეთის ბედი ბრიუსელის სამიტზე გადაწყდება. იმ შემთხვევაში, თუ ფინანსური დონორები ათენის შეთავაზებას არ დათანხმდებიან, საბერძნეთმა შესაძლოა ევროზონა დატოვოს.
