თბილისის საკრებულოში უმრავლესობისა და მერიის წარმომადგენლებმა იმ დოკუმენტის სამუშაო ვარიანტი განიხილეს, რომლითაც სტიქიის შედეგად დაზარალებულებისთვის თანხების გადანაწილება უნდა მოხდეს.
შეხვედრა დახურულ კარს მიღმა კამათის ფონზე მიმდინარეობდა.
დეპუტატების განმარტებით, შეხვედრაზე განიხილეს დოკუმენტის სამუშაო ვარიანტი, თუმცა ამ დრომდე ძირითად საკითხებზე შეთანხმება მიღწეული არ არის.
დედაქალაქის მერის მოადგილის ირაკლი ლექვინაძის განმარტებით, ამ ეტაპზე შეფასებულია უძრავი ქონების ნაწილი, დაზარალებულები დაზიანების ხარისხის მიხედვით მიიღებენ ადეკვატური ღირებულების საცხოვრისს, თუ ისინი მოხვდებიან განსახლების ზონაში.
მისივე თქმით, თუ დაზარალებულების საცხოვრებელი საჭიროებს რეაბილიტაციას, ეს რეაბილიტაცია მოხდება. ისინი ასევე მიიღებენ საოჯახო პაკეტებს, რომელიც მოიცავს პირველადი მოხმარების და საყოფაცხოვრებო ნივთებს.
ლექვინაძის განცხადებით, ავტომობილების კომპენსირების საკითხი ამ ეტაპზე არ განიხილება.
,,ჩემი პირადი პოზიციაა, რომ ავტომობილების ანაზღაურება არ უნდა მოხდეს, რადგან ამისთვის არსებობს კერძო დაზღვევა," - განაცხადა ირაკლი ლექვინაძემ.
