დედაქალაქის მუნიციპალიტეტის საკრებულოში განათლებისა და კულტურის
კომისიის სხდომა გაიმართა, რომელზეც კომისიის თავმჯდომარემ - თამარ ტალიაშვილმა კომისიის წევრებს წარუდგინა ინიციატივა, რომლის თანახმად სტიქიით დაზარალებული ბავშვები ბაგა-ბაღებში რეგისტრაციისას უპირატესობით ისარგებლებენ.
თამარ ტალიაშვილის განცხადებით, აღნიშნული წესის დამტკიცების შემთხვევაში, ბავშვები სტიქიით დაზარალებული ოჯახებიდან ბაგა-ბაღებში რეგისტრაციას უფრო ადრე გაივლიან, ვიდრე სხვა აღსაზრდელები. დეპუტატის თქმით, სტიქიით დაზარალებული ბავშვები მუნიციპალურ მომსახურებას მიიღებენ მათთვის ყველაზე ხელსაყრელი დაწესებულებისგან.
დღესვე, კომისიის სხდომაზე, კიდევ ერთხელ განიხილეს მუნიციპალიტეტის მართვაშიარსებული სკოლამდელი აღზრდის დაწესებულებების ერთ აღსაზრდელზე გათვლილივაუჩერით დაფინანსების, რეგისტრაციისა და მიღება-ამორიცხვის წესი. წესის მეორედ განხილვის საფუძველს წარმოადგენდა კომისიის თავმჯდომარის - თამარ ტალიაშვილის ინიციატივა, რომელიც 8 ივნისის სხდომაზე იქნა დაყენებული. თავდაპირველი განხილვის შემდეგ მერიასა და ბაგა-ბაღების მართვის სააგენტოს გადაეგზავნა კომისიის შენიშვნები და სწორედ ამ შენიშვნებით გათვალისწინებული წესის შესახებ იმსჯელეს დეპუტატებმა.
კომისიის დღევანდელ სხდომაზე ბაგა-ბაღების მართვის სააგენტოს წარმომადგენლებმა დეპუტატებს დეტალური ინფორმაცია მიაწოდეს. მათი თქმით, აღნიშნული წესს ბავშვების ყოველწლიურ რეგისტრაციას სამართლებრივად დაარეგულირებს. მასში პრიორიტეტულად განსაზღვრულია იმ ოჯახების სოციალური მხარდაჭერა, რომლებიც ყველაზე მეტად საჭიროებენ თანადგომას. შესაბამისად, რეგისტრაციისას პრიორიტეტი მიენიჭებათ სიღარიბის ზღვარს ქვემოთ მყოფ ოჯახთა ბავშვებს, სახელმწიფო ზრუნვის სააგენტოს, მათ შორის ჩვილ ბავშვთა სახლის ბენეფიციარებს, სპეციალური საგანმანათლებლო საჭიროების მქონე ბავშვებს და აგრეთვე იმ ოჯახის შვილებს, რომლებიც უკვე სარგებლობენ იმავე ბაღის მომსახურებით.
როგორც განათლებისა და კულტურის კომისიის თავმჯდომარემ - თამარ ტალიაშვილმა აღნიშნა, ბაგა-ბაღებში ვაუჩერიზაციისა და რეგისტრაციის წესის მიღება კიდევ ერთი წინგადადგმული ნაბიჯია. დეპუტატის განცხადებით, ბავშვები, რომელთაც 31 დეკემბრამდე უსრულდებათ 6 წელი, რჩებიან სკოლამდელი აღზრდის დაწესებულების ბენეფიციარებად და ისინი სასკოლო მზაობის პროგრამით გააგრძელებენ სწავლას. კომისიის სხდომაზე წარმოდგენილ საკითხებს დეპუტატებმა დადებითი რეკომენდაცია მისცეს.