თბილისის მუნიციპალიტეტის საკრებულოს ფრაქცია „ქართული ოცნება დემოკრატიული საქართველოსთვის“ თავმჯდომარის რიმა ბერაძის, დეპუტატის კობა კობალაძის და მერის მოადგილის ნინა ხატისკაცის ერთობლივი ვიზიტი გერმანიის ქალაქ ზაარბრიუკენში გრძელდება.
ვიზიტის ფარგლებში თბილისის დელეგაცია ზაარბრიუკენის მერს შარლოტა ბრიტს შეხვდა და ქალაქებს შორის სამომავლო თანამშრომლობაზე, გამოცდილების გაზიარებასა და ერთობლივ პროექტებზე ისაუბრეს. შეხვედრაზე მხარეებმა ასევე ერთობლივი სასწავლო და სტუდენტების ურთიერთგაცვლის პროგრამებიც განიხილეს და პოლიტიკურ საქმიანობაში ქალთა როლის მნიშვნელობასა და ჩართულობას კიდევ ერთხელ გაუსვეს ხაზი.
ზაარბრიუკენის მერმა 13 ივნისს სტიქიით დაზარალებული თბილისის მოსახლეობისათვის დახმარების სურვილი გამოთქვა. თბილისის მერის მოადგილემ კი შარლოტა ბრიტს შემოდგომაზე ”თბილისობის” დღესასწაულთან დაკავშირებით დედაქალაქში დაპატიჟა.
საკრებულოს დეპუტატებმა რიმა ბერაძემ და კობა კობალაძემ ქალაქის მერს მასპინძლობისთვის მადლობა გადაუხადეს და ,,თბილისობის’’ დღესასწაულის ფარგლებში დედაქალაქის საკრებულოში საპასუხო ვიზიტის შესაძლებლობა განიხილეს.
რიმა ბერაძე და კობა კობალაძე ზაარბრიუკენში სპეციალური სტუმრის სტატუსით იმყოფებიან, სადაც თბილისისა და ზაარბრიუკენის დაძმობილების 40 წლის იუბილესთან დაკავშირებით გამართულ მუსიკალურ ღონისძიებას და ფოტო გამოფენასაც დაესწრნენ.