13 ივნისის სტიქიის დროს დაზარალებული მოსახლეობისთვის მიყენებული ზარალის დათვლა დასრულებულია და მთავრობა ახლა კომპენსაციის გაცემის წესზე მუშაობს. ამის შესახებ განცხადებას ვაკის რაიონის გამგებელი ლაშა აბაშიძე აკეთებს.
"მუშავდება წესი, რომლის მიხედვითაც მოხდება მათთვის ზარალის ანაზღაურება. შემდგომში ეს წესი მოსახლეობას წარედგინება და დამტკიცდება. ამის შემდეგ ზარალის ანაზღაურების პროცესი დაიწყება,"- აღნიშნა აბაშიძემ.
თბილისში, სვანიძის ქუჩის მცხოვრებლები, რომლებიც 13 ივნისს, სტიქიის შედეგად დაზარალდნენ, ხელისუფლებას უყურადღებობასა და დაზარალებულთა რაოდენობის ხელოვნურ გაზრდაში ადანაშაულებენ.
მათ აღწერა საკუთარი ინიციატივით დაიწყეს და სვანიძის ქუჩის დაზარალებულთა კომიტეტი ჩამოაყალიბეს, რომელსაც თამაზ ელიზბარაშვილი ხელმძღვანელობს.
„თურმე ხუთასი კაცი ყოფილა დაზარალებული სვანიძის ქუჩაზე. ეს არის ძალიან გაბერილი რაოდენობა და ჩვენ არავის არ მივცემთ იმის უფლებას, რომ დაზარალებულთა ხარჯზე ვიღაცამ ჯიბე გაისქელოს. მაინტერესებს, ეს სია ვინ შეადგინა“, - ამბობს ელიზბარაშვილი.
შეგახსენებთ, ოფიციალური ინფორმაციით, სტიქიის ზონაში მოსახლეობისთვის მიყენებულ ზარალს ლევან სამხარაულის სახელობის ექსპერტიზის ბიურო ითვლიდა. პროცესში ჩართული იყო მერია და გამგეობა. ასევე, ეკონომიკის სამინისტრო, რომელსაც აზომვითი სამუშაოების წარმოება ევალებოდა. დაანგარიშების კრიტერიუმების გამოცდილების გამო საქმეში ჩართული იყო დევნილთა სამინისტროც.
გასული კვირის მონაცემებით, დედაქალაქის მერის ინფორმაციით, სტიქიის ზონიდან გაყვანილი 110 ოჯახიდან, უმეტესობა, სარეაბილიტაციო სამუშაოების შემდეგ, დაბრუნებას შეძლებს, ხოლო 10-მდე ოჯახი, რომელთა სახლები აღდგენას არ ექვემდებარება, ან რისკის ზონაში მდებარეობს, განსახლების გეგმაში მოექცევა.