თბილისის მერის დავით ნარმანიას განცხადებით, მუნიციპალიტეტს სრული ინფორმაცია აქვს იმის შესახებ, თუ რა ზარალი განიცადეს მოქალაქეებმა წყალდიდობის შედეგად.
,,სვანიძის ქუჩაზე, ისევე, როგორც სხვა ტერიტორიებზე სახლების აღწერა-შეფასება სრულად არის დამთავრებული. ასევე, დამთავრებულია იმ ზიანთან დაკავშირებით ინფორმაციის მოგროვება, რაც ადამიანებმა წყალდიდობის შედეგად განიცადეს. ჩვენი შესაბამისი სამსახურები და დაქირავებული კომპანია, ანკეტურ გამოკითხვას ატარებდა ადამიანებთან თუ რა დაკარგეს, როგორ დაზიანდა მათი სახლი. სახლების ზიანი შეფასებული იქნა ასევე მუნიციპალური ლაბორატორიის მიერ”, _აღნიშნა ჟურნალისტებთან საუბრისას ნარმანიამ.
თბილისში, სვანიძის ქუჩის მცხოვრებლები, რომლებიც 13 ივნისს, სტიქიის შედეგად დაზარალდნენ, ხელისუფლებას უყურადღებობასა და დაზარალებულთა რაოდენობის ხელოვნურ გაზრდაში ადანაშაულებენ.
მათ აღწერა საკუთარი ინიციატივით დაიწყეს და სვანიძის ქუჩის დაზარალებულთა კომიტეტი ჩამოაყალიბეს, რომელსაც თამაზ ელიზბარაშვილი ხელმძღვანელობს.
„თურმე ხუთასი კაცი ყოფილა დაზარალებული სვანიძის ქუჩაზე. ეს არის ძალიან გაბერილი რაოდენობა და ჩვენ არავის არ მივცემთ იმის უფლებას, რომ დაზარალებულთა ხარჯზე ვიღაცამ ჯიბე გაისქელოს. მაინტერესებს, ეს სია ვინ შეადგინა“, - ამბობს ელიზბარაშვილი.
