რიმა ბერაძე და კობა კობალაძე ქალაქ ზაარბრიუკენში, თბილისსა და ზაარბრიუკენს შორის დაძმობილების 40 წლისადმი მიძღვნილ საიუბილეო ღონისძიებებში იღებენ მონაწილეობას.
თბილისისა და გერმანიის ქალაქ ზაარბრიუკენის დაძმობილების 40 წლის იუბილესთან დაკავშირებით 26-29 ივნისს თბილისის დელეგაცია დედაქალაქის მუნიციპალიტეტის საკრებულოს ფრაქცია „ქართული ოცნება დემოკრატიული საქართველოსთვის“ თავმჯდომარის რიმა ბერაძის, საკრებულოს დეპუტატი კობა კობალაძის და თბილისის მერის მოადგილის ნინა ხატისკაცის შემადგენლობით გერმანიაში იმყოფებიან.
დელეგაციის წევრებმა ზაარბრიუკენსა და თბილისს შორის დაძმობილების 40 წლისადმი მიძღვნილ საიუბილეო ღონისძიებაში მიიღეს მონაწილეობა. ვიზიტისას ასევე ზაარბრიუკენსა და ნანტს შორის დაძმობილების 50 წლის იუბილეც აღინიშნა.
საიუბილეო საღამოზე შეკრებულ საზოგადოებას სიტყვით მიმართეს და ქალაქებს შორის არსებულ ურთიერთობებზე ზაარბრიუკენის მერმა შარლოტა ბრიტსმა, თბილისის მერის მოადგილემ და ნანტის ვიცე მერმა კაროლ დანიელმა ისაუბრეს.
ღონისძიების ფარგლებში ფოტო-გამოფენა ”თბილისი-ცხოვრება ახალ დროში” და ფოტო მარათონი ”2015 ზაარბრიუკენი-ნანტი-თბილისი ”გაიხსნა.
ზაარბრიუკენის მერმა შარლოტა ბრიტსმა, ნინა ხატისკაცმა და ნანტის ვიცე მერმა კაროლ დანიელმა ფოტო-კონკურსის გამარჯვებულები გამოავლინეს და საჩუქრებით დააჯილდოვეს.
დღეს, ქალაქ ზაარბრიუკენში დაძმობილების 40 წლის იუბილესთან დაკავშირებით ქალაქ ნანტის მერის ვიზიტია დაგეგმილი. დღესვე საკრებულოს წევრებსა და ზაარბრიუკენის და ნანტის მერიის უმაღლეს წარმომადგენლებს შორის ორმხრივი შეხვედრები გაიმართება.
