იუსტიციის მინისტრის ინიციატივით გამოცხადებული უფასო პირადობის მოწმობების აქცია დასრულდა. მისი შედეგები თეა წულუკიანმა დღეს, 24 ივნისს, შეაჯამა.
თავისი ხანგრძლივობითა და შედეგიანობით ეს აქცია ყველაზე მასშტაბური იყო სხვა მსგავსი ტიპის აქციებს შორის. ელექტრონული პირადობის მოწმობა საქართველოს 441 345-მა მოქალაქემ აიღო, რომელთაც არასოდეს ჰქონიათ ეს დოკუმენტი. აქციის შედეგად 9330-ით შემცირდა რეგისტრაციის არმქონე პირთა რიცხვი, 1100-ით შემცირდა უსაბუთო პირთა რიცხვი, რადგან აქციამდე სწორედ 110 ადამიანი პირადობის დამადასტურებელ არანაირ დოკუმენტს არ ფლობდა.
განსაკუთრებული აქტივობით აქციის ბოლო დღეები გამოირჩეოდა. 16, 17 და 18 ივნისს პირადობის მოწმობის აღების მსურველთა რიცხვი განუხრელად იზრდებოდა, 19 ივნისს კი მათმა რაოდენობამ 15 427-ს მიაღწია.
იუსტიციის მინისტრის ინიციატივას ყველაზე აქტიურად ხარაგაულის, ხულოს, ადიგენის, გალის, დუშეთის, ასპინძისა და ამბროლაურის მოსახლეობა გამოეხმაურა. მხოლოდ ხარაგაულში პირადობის მოწმობა უფასოდ 1 433-მა მოქალაქემ აიღო.
ჯამში, დღეს, 1,9 მილიონ ადამიანს აქვს ელექტრონული პირადობის მოწმობა და აქედან 1,8 მილიონი სრულწლოვანი მოქალაქეა.
„ამ აქციის შედეგად დღეს შეგვიძლია ვთქვათ, რომ 1,8 მილიონი სრულწლოვანი მოქალაქის მონაცემები არის დაზუსტებული, რადგან ისინი უკვე ელექტრონულ პირადობას ფლობენ. ასევე დაზუსტებულია 270 000 სრულწლოვანი მოქალაქის მონაცემი, რომლებიც არ ფლობენ ელექტრონული პირადობის მოწმობას, მაგრამ აქვთ ბიომეტრიული პასპორტი. ეს კი ნიშნავს, რომ დაახლოებით 2 მილიონზე მეტი პოტენციური ამომრჩევლის მონაცემი მაქსიმალურად ზუსტია, მათ შორის ფოტოსურათებიც, რაც საარჩევნო სიის შედგენისას შარშანდელი წლიდან ძალიან მნიშვნელოვანია. მადლობას ვუხდი ყველა იმ იუსტიციელს, რომელმაც ამგვარი მასშტაბური და ქვეყნისთვის მნიშვნელოვანი სამუშაოს წარმატებით განხორციელებაში მიიღო მონაწილეობა.“ - განაცხადა იუსტიციის მინისტრმა.
აქციის მიზანი იყო დოკუმენტებზე ხელმისაწვდომობის გაზრდა მოქალაქეებისთვის და ასევე საარჩევნო სიის შედგენისათვის აუცილებელი მონაცემების კიდევ მეტად დახვეწა. გარდა ამისა, ქართული პირადობის დამადასტურებელი მოწმობა უსაფრთხო დოკუმენტია. უსაფრთხო დოკუმენტებს კი დიდი მნიშვნელობა ენიჭება ვიზალიბერალიზაციისა და ევროპასთან უვიზო მიმოსვლის პროცესში. ამ ნაწილში ევროკავშირმა საქართველოს ყველა სამუშაო ბოლომდე შესრულებულად რიგის სამიტამდე ჩაუთვალა.
ელექტრონული პირადობის მოწმობის აღება უფასოდ მოქალაქეებს 20 აპრილიდან 20 ივნისამდე შეეძლოთ. ისინი თავისუფლდებოდნენ როგორც პირადობის მოწმობის საფასურის, ისე ფოტოსურათის გადაღებისა და ბანკის მოსაკრებლისგან. მოქალაქეობის დამადასტურებელი დოკუმენტის აღება შესაძლებელი იყო იუსტიციის სახლის ფილიალებსა და სახელმწიფო სერვისების განვითარების სააგენტოს რეგიონულ ცენტრებში.
