სტიქიით დაზარალებული მოსახლეობის დასახმარებლად ვებ-გვერდის help.tbilisi.gov.ge-ს პრეზენტაცია გაიმართა. პრეზენტაცია დედაქალაქის მერიაში ვიცე-მერმა დიმიტრი ქუმსიშვილმა გამართა.
როგორც დიმიტრი ქუმსიშვილმა განაცხადა, აღნიშნული ვებ-გვერდის მეშვეობით მოქალაქეებსა და კომპანიებს დაზარალებულთა დახმარების შესაძლებლობა აქვთ.
ვებგვერდზე საჭიროებები სორტირებულია სხვადასხვა მიმართულებით.
საიტზე საჭიროებები დაყოფილია 4 კატეგორიის მიხედვით. ეს კატეგორიებია: დახმარება საჭიროებების მიხედვით, დახმარება ოჯახების მიხედვით, ტექნიკური დახმარება და სხვა სახის მხარდაჭერა. თავის მხრივ, კატეგორია "დახმარება" საჭიროების მიხედვით აერთიანებს შემდეგ მიმართულებებს: საცხოვრებელი, ავეჯი, საყოფაცხოვრებო ტექნიკა, საყოფაცხოვრებო ნივთები, დამხმარე საყოფაცხოვრებო ნივთების ნაკრები, 5 წლამდე ბავშვის ნივთები, პირადი ჰიგიენის ნივთების ნაკრები, სამედიცინო ნაკრები, დასვენება, სპეცტექნიკა და სხვადასხვა.
კატეგორიაში დახმარება ოჯახების მიხედვით, მოცემულია საჭიროებები კონკრეტული ოჯახების შესაბამისად.
"ტექნიკურ დახმარებაში" ჩამოთვლილი არის საჭირო სპეცტექნიკა, ხოლო სხვა სახის მხარდაჭერაში მოცემულ თავისუფალ ფანჯარაში მოქალაქეებს შეუძლიათ თავად გააგზავნონ არასტანდარტული შეთავაზება.
"პრინციპულად მნიშვნელოვანია, რომ ვებ-გვერდი არის ძალიან გამჭვირვალე, ინტერაქტიული, ყველა დაპირება, რომელიც ვებ-გვერდზე კეთდება, პრაქტიკულად იმ წუთშივე აისახება და შემდგომ ყველასთვის ხელმისაწვდომია. დაპირების შემდეგ ჩვენი ოპერატორები უკავშირდებიან ქველმოქმედს, მასთან აზუსტებენ ყველა დეტალს და ეხმარებიან, რომ მან თავისი დაპირება აასრულოს", - განაცხადა დიმიტრი ქუმსიშვილმა.
მისივე ინფორმაციით, კარგი იქნება, თუ დაზარალებულ ოჯახებს ზღვისპირა ან მთაში განთავსებული სასტუმროები დასვენებას შესთავაზებენ.
ამასთან, ვებ-გვერდზე მოცემული არის საქველმოქმედო ანგარიში, სადაც თანხის გადარიცხვაა შესაძლებელი.
ვებ-გვერდი განახლებადი იქნება.
