დრამატურგმა ლაშა თაბუკაშვილმა შეაქო ხელისუფლების მოქმედებები სტიქიური უბედურების დროს. როგორც რუსთაველის პრემიის ლაურეატმა "იმედის კვირის" ეთერში განაცხადა, „ხელისუფლებამაც კი ადამიანური სახე წარმოაჩინა“.
„პირველად ვაქებ ხელისუფლებას, ხელისუფლებამაც კი ადამიანური სახე წარმოაჩინა. რა თქმა უნდა, იყო შეცდომები - ჩვენ არ ვართ იაპონელები, რომ წინასწარ მომზადებულები ვიყოთ სტიქიონის წინაშე. მე მინდა ვთქვა, რომ ეს იყო კათარზისი და ამაღლება“, - განცხადა ლაშა თაბუკაშვილმა.
ამასთანავე მწერალმა საზოგადოებასა და ზოოპარკის ბინადრებს შორის პარალელი გაავლო.
„ჩვენი საზოგადოებაც თავისებური ზოოპარკია: არიან ვეფხვები, პანდები, შვლები, აფთრები, მაგრამ არის კიდევ ტერარიუმი, აი ამ ტერარიუმმა, არშემდგარმა და დაბოღმილმა ნაწილმა (რომელიც ყველაფერში ეძებს ტალახს), არ უნდა გამოიყენოს ამ ახალგაზრდების ლამაზი ენერგია, - განაცხადა ლაშა თაბუკაშვილმა და დაამატა: ეს ის ახალგაზრდები არიან, რომლებიც უნდა მოსულიყვნენ, როდესაც ჩვენ მივდივართ. მათ ჩვენზე უფრო დიდი კულტურით, ჩვენზე უფრო დიდი მოქალაქეობრივი შეგნებით გაატარეს ის ხაზი, რომელიც გაატარეს.“
