„სტუდენტური დღეები 2015“-ში გამარჯვებისათვის მიღებული თანხა სტუ-ის სტუდენტებმა სტიქიით დაზარალებულთა ფონდში გადარიცხეს საქართველოს ტექნიკური უნივერსიტეტის სტუდენტური თვითმმართველობა კიდევ ერთხელ ღრმა მწუხარებას გამოთქვამს თბილისში მომხდარი სტიქიური უბედურების გამო და თანაგრძნობას უცხადებს გარდაცვლილთა ოჯახებს. სტუ-ის სტუდენტური თვითმმართველობის ორგანიზებით, 14 ივნისის დილიდანვე მოხდა სტუდენტური რაზმების მობილიზება. სტუ-ის სტუდენტები რამოდენიმე დღეა აქტიურად არიან ჩართული და შეძლებისდაგვარად ცდილობენ, დაეხმარონ დაზარალებულ მოსახლეობას და მონაწილოება მიიღონ დედაქალაქის გაწმენდით სამუშაოებში. სტუ-ის სტუდენტური თვითმმართველობის გადაწყვეტილებით გარდაცვლილთა და დაზარალებულთა ოჯახების დასახმარებლად ქ. თბილისის მერიის შესაბამის ფონდში გადაირიცხება 2 000 ლარი რომელიც საქართველოს ტექნიკურ უნივერსიტეტს გადაეცა „სტუდენტური დღეები 2015“-ში გამარჯვებისათვის. სტუ-ის სტუდენტური თვითმმართველობა კიდევ ერთხელ დიდ მადლობას უხდის თითოეულ სტუდენტს, ვინც ამ ხნის განმავლობაში სხვადასხვა ფორმით აქტიურად იყო ჩართული სტიქიის შედეგად დაზარალებული ოჯახების დახმარების პროცესში თუ ქალაქის დასუფთავების აქციაში.
