თბილისის მერის დავით ნარმანიას განცხადებით, ვერეს ხეობის გრძელვადიანი განვითარებისთვის, პროექტის ცვლილება აუცილებელი იქნება.
ვერეს ხეობისა და მისი მიმდებარე ტერიტორიების შესწავლისა და შემდგომი აღდგენითი სამუშაოების ორგანიზების მიზნით შექმნილი უწყებათაშორისი კომისიის პირველი სხდომის დასრულების შემდეგ, ნარმანიამ ჟურნალისტებტან განაცხადა, რომ განხილული იყო პრობლემის გადაჭრის როგორც დროებითი, ასევე გრძელვადიანი საკითხები.
„მნიშვნელოვანი საკითხი, რომელზეც ვიმსჯელეთ, არის დროებითი გადაწყვეტის საკითხი. არსებული გზისა და მისი გამტარუნარიანობის, მდგრადობის შესწავლა და მეორე, ეს არის უფრო გრძელვადიანი საკითხები, თუ როგორ უნდა განვითარდეს მომავალში პროექტი, რათა შესაძლო უხვი ნალექების პირობებში იგივე კატეგორიის საფრთხის წინაშე არ დავდგეთ. ვიმსჯელეთ, თუ რა ფორმით და როგორ შეიძლება არსებული გზა აღვადგინოთ, ამისთვის რა რესურსები იქნება საჭირო. ასევე, მეორე მხრივ, პარალელურ რეჟიმში სხვადასხვა უწყების ძალიან აქტიური ჩართულობით გრძელვადიანი პროექტების განვითარების საკითხი განვიხილეთ. გრძელვადიანი განვითარების თვალსაზრისით, აუცილებელი იქნება პროექტის ცვლილება და სხვანაირი ტიპის საინჟინრო გადაწყვეტილება“, - განაცხადა თბილისის მერმა.
