საქართველოს სოფლის მეურნეობის სამინისტროს სსიპ სურსათის ეროვნული სააგენტოს სპეციალისტების მიერ 13 ივნისის სტიქიის ზონაში, კერძოდ სოფელ ახალდაბის ტერიტორიაზე ჩატარებული კვლევების შედეგად ჯილეხის დაავადების კერები არ დაფიქსირდა. შესაბამისად, არ არსებობს დაავადების გავრცელების საშიშროებაც. მიუხედავად ამისა, სახელმწიფო ვეტერინარები მოუწოდებენ სტიქიური უბედურების ზონაში სალიკვიდაციო სამუშაოებში ჩართულ პირებს, მიწისა და ღორღის ნაშალ ქანებთან მუშაობისას გამოიყენონ რეზინის ხელთათმანები და ჩექმები. ცხოველთა სამარხის აღმოჩენის შემთხვევაში აცნობონ სოფლის მეურნეობის სამინისტროს ან სურსათის ეროვნული სააგენტოს.
ჯილეხი ადამიანისა და ცხოველის საერთო, ინფექციური, მწვავედ მიმდინარე დაავადებაა. დაავადების გამომწვევი ვირუსი დიდხანს ძლებს ნიადაგში, ამიტომაც ცხოველების ამ დაავადებით დაცემის ადგილზე ეწყობა სპეციალური სამარხი-სარკოფაგი, რომელიც ბეტონით არის დაცული და შემოგარსულია დამცვი ღობით. საქართველოს ტერიტორიაზე ისტორიულად ფიქსირებული ყველა კერა აღრიცხულია. დაავადების გავრცელების საშიშროება იმატებს წყალდიდოებების შემდეგ, როდესაც ხდება სამარხების გადარეცხვა. თუმცა, როგორც სპეციალისტები განმარტავენ, 13 ივნისის სტიქიის ზონაში ჯილეხის კერები არ ფიქსირდება.