13 ივნისს თბილისში მომხდარ სტიქიასთან დაკავშირებით, მთავრობაში სახელმწიფო კომისია შეიქმნა. ამის შესახებ პრემიერ-მინისტრმა ირაკლი ღარიბაშვილმა განაცხადა. მისი თქმით, სამინისტროების წარმომადგენლებთან ერთად კომისიაში ჩართულები იქნებიან მსოფლიოში აღიარებული უცხოელი და ქართველი ექსპერტებიც.
ვერეს ხეობის ახლებურად დაგეგმარების საკითხზე შექმნილი სახელმწიფო კომისიის პირველი სხდომა მთავრობის კანცელარიაში მიმდინარეობს. შეხვედრას სხვადასხვა სფეროს სპეციალისტები, მეცნიერებათა აკადემიის წარმომადგენლები ესწრებიან.
,,ერთხელ და სამუდამოდ უნდა დავადგინოთ, თუ როგორ უნდა დაგეგმარდეს ვერეს ხეობა, გლობალური ხედვა უნდა ჩამოყალიბდეს, რის მიხედვითაც უნდა დაიგეგმოს ყველა სამუშაო ამ ხეობაში. უნდა შეიქმნას პრეცენდენტი, რომ საზოგადოებისთვის ასეთ მნიშვნელოვან საკითხზე დისკუსია გაიმართოს. ყველა სპეციალისტს უნდა შეეძლოს დისკუსიაში ჩართვა და ჩვენ, გადაწყვეტილების მიმღებ პირებს უნდა გვქონდეს საშუალება, ყველა ალტერნატივას მოვუსმინოთ და შემდეგ ყველაზე სწორი გადაწყვეტილება მივიღოთ", - განაცხადა ღარიბაშვილმა.
მისივე ინფორმაციით, მსოფლიო დონის ექსპერტებთან ერთად იწყება მუშაობა ვერეს ხეობის შესწავლაზე და ამ სამუშაოს შედეგად უნდა მომზადდეს მაღალკვალიფიციური დასკვნა, რომლითაც აღნიშნულ ტერიტორიაზე ნებისმიერი პროექტის განხორიცელებისას იხელმძღვანელებენ.
პრემიერმა შეხვედრაზე მონაწილე ყველა სპეციალისტი დაასახელა და განაცხადა, რომ კომისიის მუშაობისთვის მათი აზრი მნიშვნელოვანი იქნება.
როგორც ირაკლი ღარიბაშვილმა განაცახდა დახმარების სურვილი საქართველოს ხელისუფლებამ, მსოფლიო ბანკისგან, წითელი ჯვრისგან, USID-ისგან, შვედეთისგან და გერმანიისგან უკვე მიიღო. ქვეყანას დახმარების გაწევას პირდებიან თბილისში აკრედიტირებული დიპლომატიური კორპუსის წარმომადგენლებიც.
პრემიერმინისტრი ამბობს, რომ აუცილებელია დროულად დასრულდეს გაწმენდითი სამუშაოები და დაიწყოს აღდენითი სამუშაოები, თუმცა ვერეს ხეობაში უნდა მიღებული იყოს სპეციალური დასკვნა ამ ხეობის განსავითარებლად.
