პრეზიდენტ გიორგი მარგველაშვილს პირადი ნივთი - პერანგის ვერცხლის სამაგრები სტიქიით დაზარალებულთა დასახმარებლად აუქციონზე გააქვს.
საქველმოქმედო აუქციონი „ქორთიარდ მარიოტში” 19 :00 საათზე გაიმართება.
პრეზიდენტის პრესსამსახურის ინფორმაციით, საუკუნის და წლის სახელების დაჯილდოება და ყოველწლიური მედიაპროექტ „სახე(ლ)ების“ სამტომეულის (წლის ისტორია, ბიზნეს-ისტორია, ქართულ-გერმანული სახელები) წარდგენა, რომელიც 19 ივნისსაა დაგეგმილი სასტუმრო „ქორთიარდ მარიოტში,“ არ გადაიდება - საღამო საქველმოქმედო ხასიათს შეიძენს, სადაც სტიქიით დაზარალებულთა დასახმარებლად საქველმოქმედო აუქციონი გაიმართება.
ღონისძიებიდან ამოღებული იქნება სცენარით გათვალისწინებული ყველა სადღესასწაულო ელემენტი, პარტნიორი კომპანიების მიერ დაწესებული, საღამოს სტუმრებისთვის გათვალისწინებული პრიზები გადაკეთდება სააუქციონე ლოტებად და გაიყიდება აუქციონის წესით. სადღესასწაულო ტორტი, რომლითაც უნდა დასრულებულიყო საღამო, გაეგზავნება სტიქიით დაზარალებულ ბავშვებს.
საღამოზე წაკითხული იქნება პეტიცია ვერეს ხეობაში ცენტრალური ტყე-პარკის მოწყობის და ზოოპარკის ტერიტორიაზე, მისი სხვა ადგილზე გადატანის შემდეგ, რეკრეაციული ზონის დაარსების მოთხოვნით. მსურველებს შეეძლებათ, ადგილზე მოაწერონ ხელი პეტიციას.
