სახელმწიფო უსაფრთხოებისა და კრიზისების მართვის საბჭოს მდივნის მოადგილემ გიორგი ღიბრაძემ დედაქალაქში არსებული ვითარების შესახებ ჟურნალისტებს ინფორმაცია მიაწოდა. როგორც გიორგი ღიბრაძემ განმარტა ამ დროისთვის დაღუპულია 19 ადამიანი, ხოლო უგზო-უკვლოდ დაკარგულად 3 ადამიანი ითვლება.
„სტიქიის შედეგად დაღუპულია 19 ადამიანი, უგზო-უკვლოდ დაკარგულად ითვლება 3 ადამიანი. დაკარგული ცხოველების შესახებ მერიისა და შსს-ს მიერ მოწოდებული ინფორმაციის თანახმად, ქალაქში ჯერჯერობით არცერთი მტაცებელი ცხოველი ნაპოვნი არ არის. ზოოპარკის ტერიტორიაზე მობილიზებული სამაშველო სამსახური, რომელიც ადგილზე ახდენს ჩასატარებელი სამუშაოების შეფასებას', _განაცხადა ღიბრაძემ.
მისივე განმარტებით, მოხალისეთა შეშვება სტიქიით დაზარალებულ უბნებში შეზღუდულია.
,,მათ აუცილებლად უნდა ეცვათ დახურული ტანისამოსი და ფეხსაცმელი ," - განაცხადა სახელმწიფო უსაფრთხოებისა და კრიზისების მართვის საბჭოს მდივნის მოადგილე გიორგი ღიბრაძემ და აღნიშნა, რომ სამედიცინო დაწესებულებებში სტიქიის შედეგად დაშავებული 6 ადამიანი რჩება.
არსებული ინფორმაციით, ზოოპარკიდან გაქცეულ ერთ ვეფხვსა და აფთარს ეძებენ. თუმცა, ზოოპარკიდან გაქცეულ ცხოველებთან დაკავშირებით ურთიერთგამომრიცხავი ვერსიები ვრცელდება.