განათლების სამინისტრო 2015 წლის 13 ივნისს მომხდარი სტიქიის შედეგად დაზარალებულ სტუდენტებსა და მოსწავლეებს შეღავათებს სთავაზობს.
კერძოდ, 2015 წლის სტიქიის შედეგად დაღუპულთა ოჯახის წევრ და უსახლკაროდ დარჩენილი სტუდენტების 2015-2016 სასწავლო წლის სწავლის გადასახადს სახელმწიფო დაფარავს. სტუდენტებში იგულისხმებიან ის აბიტურიენტები, რომლებიც წელს ჩაირიცხებიან აკრედიტირებულ საგანმანათლებლო პროგრამებზე.
სამინისტროს განმარტებით, სწავლის გადასახადში იგულისხმება 2015-2016 აკადემიური წლის საფასური, სახელმწიფო სასწავლო გრანტისა და სახელმწიფო სასწავლო სამაგისტრო გრანტის მაქსიმალური ოდენობა.
სამინისტროს უმაღლესი განათლების დეპარტამენტი შეიმუშავებს პროგრამას და წარუდგენს მთავრობას დასამტკიცებლად უახლოეს მთავრობის სხდომაზე.
ასევე მოსწავლეებს, რომელთაც 13 ივნისის სტიქიის შედეგად სხვადასხვა პროგრამის ფარგლებში მიღებული კომპიუტერები და სახელმძღვანელოები დაუზიანდათ, სამინისტრო ახალ ნივთებს გადასცემს.
ამასთან მანდატურის სამსახურთან არსებული ფსიქოლოგიური ცენტრი ყველა მოსწავლეს და მათ მშობლებს საჭიროების შემთხვევაში მომსახურებას უფასოდ გაუწევს.
სამინისტრო ასევე იმუშავებს ივანე ჯავახიშვილის სახელობის თბილისის სახელმწიფო უნივერსიტეტთან, რათა მოხდეს ჰიდროლოგიური ლაბორატორიისა და მიმდებარე ტერიტორიების შეფასება და სპეციალისტების დასკვნების შესაბამისად დაიგეგმოს ლაბორატორიის აღდგენითი სამუშაოები.
