18, 19 და 20 ივნისს ბათუმის რეფერალური ჰოსპიტალის ინიციატივითა და „სამედიცინო კორპორაცია ევექსის“ ორგანიზებით ხულოს, შუახევისა და ქედის რაიონულ ჰოსპიტალებში მოსახლეობას უფასო სამედიცინო კონსულტაციები ჩაუტარდება.
აჭარის მაღალმთიანი რეგიონის მოსახლეობას ადგილზე კონსულტაციებს ბათუმის რეფერალური ჰოსპიტალის წამყვანი კარდიოლოგები გაუწევენ, საჭიროების შემთხვევაში პაციენტებს გულის ექოსკოპიური კვლევაც ჩაუტარდებათ.
აღსანიშნავია, რომ გულ–სისხლძარღვთა სისტემის პათოლოგიების ადრეულ ეტაპზე გამოვლენა უეცარი სიკვდილიანობის მაჩვენებელს მნიშვნელოვნად ამცირებს და გამოჯანმრთელების შანსებს ზრდის.
2014 წლიდან ბათუმის რეფერალურ ჰოსპიტალში კარდიოლოგიისა და კარდიოქირურგიის განყოფილება ფუნქციონირებს, სადაც აჭარის მოსახლეობას საშუალება აქვს რეგიონიდან გაუსვლელად მიიღოს კარდიოლოგიური და კარდიოქირურგიული სრული მომსახურება, მათ შორის ჰოსპიტალში სრული დატვირთვით ფუნქციონირებს კათეტერიზაციის ლაბორატორია სადაც შესაძლებელია გულ–სისხლძარღვთა მწვავე უკმარისობისას კორონაროგრაფიისა და სტენტირების ჩატარება.
აღნიშნული სამედიცინო მომსახურების მიღება აჭარაში მცხოვრები მოსახლეობისთვის წლების განმავლობაში მხოლოდ თბილისსა და ქუთაისში იყო შესაძლებელი.
18 ივნისი
ხულოს რაიონული ჰოსპიტალი– 11:00 – 16:00 სთ, მის.: აღმაშენებლის ქ. №1
19 ივნისი:
შუახევის რაიონული ჰოსპიტალი – 11:00 – 16:00, მის.:რუსთაველის ქ. №32
20 ივნისი:
ქედის რაიონული ჰოსპიტალი – 11:00 – 16:00 სთ, მის.:რუსთაველის ქ. №14