გმირთა მოედანზე მდებარე საცხოვრებელი კორპუსის მიმდებარე ტერიტორიისა და შიდა ეზოს დასუფთავება მიმდინარეობს. მობილიზებულია სპეციალური ტექნიკა, რომელსაც კორპუსის შიდა ეზოდან ნაშალი მიწა და შლამი გააქვს. თბილისის მერიის განათლების, სპორტისა და ახალგაზრდულ საქმეთა საქალაქო სამსახურის ორგანიზებით, გაწმენდით სამუშაოებში ჩართული არიან მოხალისეები და სხვადასხვა უმაღლესი სასწავლებლის სტუდენტები. სამუშაოებს კოორდინაციას განათლების, სპორტისა და ახალგაზრდულ საქმეთა საქალაქო სამსახურის ხელმძღვანელი გიორგი არეშიძე უწევს.
„ამ წუთებში გმირთა მოედნის მიმდებარე ტერიტორიაზე მობილიზებულია 200-მდე მოხალისე. „თბილსერვის ჯგუფის“, კეთილმოწყობის საქალაქო სამსახურის თანამშრომლებთან და მოხალისეებთან ერთად შლამისგან ვასუფთავებთ მიმდებარე ტერიტორიას. ადგილობრივ მოსახლეობას ეზოში გადაადგილება უკვე შეუძლია, რაც ამ ახალგაზრდების დამსახურებაა. ასეთი მობილიზებისა და ორგანიზებისთვის მინდა მათ მადლობა გადავუხადო“, - განაცხადა გიორგი არეშიძემ.
გმირთა მოედანზე, კოსტავას №63-ში მდებარე საცხოვრებელი კორპუსის ეზო და მიმდებარე ტერიტორია 13 ივნისს სტიქიის შედეგად დაიტბორა.