სახელმწიფო უსაფრთხოებისა და კრიზისების მართვის საბჭო სტიქიის შედეგად არსებული ვითარების შესახებ განცხადებას ავრცელებს სადაც მითითებულია, რომ 13 ივნისს სტიქიური მოვლენების განვითარების შემდეგ საგანგებო შტაბში შემუშავებულ იქნა პრევენციული ღონისძიებების გეგმა.უწყებამ სწორედ დღეს ამ გეგმის შესაბამისად იმოქმედა.
,,მას შემდეგ რაც გარემოს დაცვის სამინისტროდან შემოვიდა ინფორმაცია მდინარე ვერეს წყალშემკრები აუზის არეალში ამინდის შესაძლო გაუარესების შესახებ, რამდენიმე წუთის განმავლობაში განხორციელდა მდგომარეობის გადამოწმება სასიგნალო სისტემის მეშვეობით და მიღებულ იქნა გადაწყვეტილება მდ. ვერეს ხეობაში მიმდინარე აღდგენითი სამუშაოების დროებით შეჩერების შესახებ. განხორციელდა ადამიანების და ტექნიკის გაყვანა უსაფრთხო ზონაში. სამუშაოები განახლდება ამინდის გაუმჯობესებისთანავე.ბაგებში და წყნეთი-ახალდაბას მიმართულებაზე მიმდინარეობს ვითარების მონიტორინგი, ადგილზე მობილიზებულია სამაშველო და ყველა სხვა შესაბამისი სამსახური და ნებისმიერი შესაძლო გართულების შემთხვევაში განხორციელდება შესაბამისი ღონისძიებები”, _ნათქვამია უწყების განცახდებაში.
სახელმწიფო უსაფრთხოების და კრიზისების მართვის საბჭო თხოვნით მიმართავს მედიასაშუალებებს თავი შეიკავონ დაუზუსტებელი ინფორმაციის გავრცელებისგან რათა არ შეუწყონ ხელი მოსახლეობაში პანიკის გავრცელებას.
სახელმწიფო უსაფრთხოების და კრიზისების მართვის საბჭო მოსახლეობას მოვუწოდებს სიმშვიდისკენ.
,,ვაცხადებთ, რომ მდინარე ვერეს ხეობაში სიტუაცია ექვემდებარება კონტროლს. ამასთანავე, მოვუწოდებთ მოქალაქეებს უკიდურესი აუცილებლობის გარდა თავი შეიკავონ ავტომანქანებით გადაადგილებისგან”, -აცახდებენ უწყებაში.
