საქართველოს პრემიერ-მინისტრი ირაკლი ღარიბაშვილი მედიის წარმომადგენლებს მოუწოდებს ტერმინი ,,ევაკუაცია” ოფიციალურ სტრუქტურებთან დაუზუსტებლად არ გამოიყენონ.
ამის შესახებ ჟურნალისტებს პრემიერმა გმირთა მოედანზე განუცხადა, სადაც მოსალოდნელი წვიმის გამო გაწმენდითი სამუშაოები შეწყდა.
„მე მინდა ვთხოვო ყველას, მედიას, რომ სიტყვა ევაკუაციას, ასეთ საპანიკო სიტყვას, ნუ გამოიყენებთ მანამ, სანამ ოფიციალური სტრუქტურის წარმომადგენელი არ გააკეთებს კომენტარს. არის შექმნილი საგანგებო შტაბი. ინფორმაცია სისტემატურ რეჟიმში მოგეწოდებათ. ინფორმაციაზე წვდომის პრობლემა თქვენ არ გაქვთ. ასე რომ, ძალიან გთხოვთ, მოსახლეობა არ შეიყვანოთ შეცდომაში.
ეს არის ჩემი თხოვნა, იმიტომ, რომ ამ სიტუაციაში, ამ კრიზისულ სიტუაციაში, კრიზისული ვითარების სწორად მართვისთვის ჩვენ გვესაჭიროება სწორი და ობიექტური ინფორმაციიის მიწოდება მოსახლეობამდე. ამაში თქვენი ჩართულობა უმნიშვნელოვანესია, ამიტომ მოგიწოდებთ ყველას, მანამ, სანამ არ მიიღებთ დადასტურებულ ინფორმაციას, არ გაავრცელოთ“, - განაცხადა პრემიერმა.
მისივე თქმით, ვინაიდან დღეს ამინდი შეიცვალა, არის მოსალოდნელი წვიმა, უსაფრთხოების მიზნებიდან გამომდინარე, მოქალაქეების უსაფრთხოების მიზნით საგანგებო შტაბმა მიიღო გადაწყვეტილება, რომ დროებით ეს სამუშაოები შეჩერდეს და მოხალისეები და ტექნიკა სტიქიის ადგილიდან გაყვანილი იყოს.