თბილისის მუნიციპალიტეტის საკრებულოს ჩუღურეთის რაიონის მაჟორიტარმა დეპუტატმა - რიმა ბერაძემ, რაიონის გამგებელთან ზურაბ ჩიკვილაძესთან და გამგეობის წარმომადგენლებთან ერთად, ჩეჩელაშვილის ქუჩის N74-ში მცხოვრები ოჯახები მოინახულა, რომელთა სახლის ეზოს, მეწყერმა 6 მეტრიანი კედელი დაუნგრია და სახლამდე მისასვლელი გზა ჩახერგა.
დეპუტატი ვითარებას ადგილზე გაეცნო, მოსახლეობას გაესაუბრა და სტიქიის შედეგები დაათვალიერა, მათ შორის, ერთ-ერთი ადგილობრივის სახლიც, რომლის საყრდენი კედელიც ეზოს კედლის დანგრევამ გაბზარა.
მაჟორიტარი დეპუტატი მოსახლეობას, თავისი კომპეტენციის ფარგლებში, დახმარებას დაპირდა და აღნიშნა, რომ მათი უსაფრთხოების დაცვისთვის ზრუნვა დაწყებულია.
რიმა ბერაძის განცხადებით, ჩეჩელაშვილის ქუჩის N74-ში მცხოვრებთა წინაშე არსებული პრობლემის მოგვარებაში ჩართულია რაიონის გამგეობა და მერიის კეთილმოწყობის საქალაქო სამსახური.
„ჩუღურეთის რაიონი და განსაკუთრებით ეს ადგილი - ჩეჩელაშვილის ქუჩა - მეწყერსაშიში ზოლია. ძლიერი წვიმის შედეგად, მოსახლეობის მიერ, ხელოვნურად შექმნილი ტერასები ჩამოიშალა და მიწის მასამ მოძრაობა დაიწყო.
დღეს მდგომარეობა საშიშია, მაგრამ ყველაფერი კეთდება საიმისოდ, რომ მოსახლეობის უსაფრთხოება დაცული იყოს და გამაგრებითი სამუშაოები უმოკლეს ვადაში დაიწყოს“, - განაცხადა რიმა ბერაძემ და აღნიშნა, რომ მიუხედავად თბილისში შექმნილი რთული სიტუაციისა, ჩეჩელაშვილის ქუჩის N74-ში გამაგრებითი სამუშაოები უმოკლეს ვადაში დაიწყება
