ვაკის რაიონის გამგეობა საგანგებო რეჟიმში მუშაობს. პრემიერის პრესსამსახურის ინფორმაციით, გამგეობის ყველა თანამშრომელი 24 საათის განმავლობაში მობილიზებულია. გამოყოფილია სპეციალური ნომრები, რომლებზე დაკავშირებაც დღე-ღამის ნებისმიერ მონაკვეთში ყველას შეუძლია.
გამგეობის თანამშრომლებმა, რომლებიც ასევე კოორდინაციას უწევენ მოხალისეებს, ოპერატიულად შეიმუშავეს და განახორციელეს დახმარების სპეციალური გეგმა.
ვაკის რაიონში მცხოვრები ყველა დაზარალებული, რომელთა რაოდენობა, ბოლო მონაცემებით, 298 ადამიანს შეადგენს, საცხოვრებლით უზრუნველყოფილია.
მოსახლეობის ნაწილისთვის ნაქირავებია ბინები, ნაწილი კი სასტუმროებში განთავსდა.
წყნეთის ქუჩის #13-ე კორპუსიდან, საექსპერტო დასკვნის საფუძველზე, მოსახლეობის ევაკუაცია განხორციელდა. კორპუსში მცხოვრებ 32 ოჯახს საფრთხეს მდინარე ვერე უქმნის, რომელმაც, არსებული ინფორმაციით, კორპუსის საძირკველი დააზიანა.
დაზარალებულები უზრუნველყოფილი არიან საკვები პროდუქტით, პირველადი მოხმარების ნივთებითა და ტანსაცმლით. მოსახლეობას დახმარება დროებით საცხოვრებელ ადგილებზე ეგზავნება, სურვილის შემთხვევაში კი, მათ შესაძლებლობა აქვთ აღნიშნული ნივთები გამგეობიდან პირადად წაიღონ.
სტიქიის დაწყების მომენტიდან ყველა ცხელ ცერტილში გასული იყო გამგეობის სპეციალური ჯგუფები, რომლებმაც შეისწავლეს პრობლემები, შევიდა ტექნიკა და ჩატარდა გაწმენდითი სამუშაოები. ამჟამად მიმდინარეობს ინფორმაციის დამუშავება, შესაძლო საფრთხეების თავიდან ასაცილებლად. პარალელურ რეჟიმში, აქტიურად ხორციელდება ინფრასტრუქტურის აღდგენითი სამუშაოები.
გამგეობის თანამშრომლები მოსახლეობასთან აქტიურ კომუნიკაციას განაგრძობენ. მიღებულია ყველა ზომა, რათა სტიქიის განმეორების შემთხვევაში, ზარალი თავიდან იყოს აცილებული.
