სტიქიის ზონა საერთაშორისო დონორი ორგანიზაციების წარმომადგენლებმა მოინახულეს. თბილისის ვიცე-მერმა დიმიტრი ქუმსიშვილმა დონორ ორგანიზაციებს ვითარება ადგილზე გააცნო.
დიმიტრი ქუმსიშვილის განცხადებით, დონორთა კონფერენცია ფინანსთა სამინისტროში გაიმართა, სადაც მათ წარედგინა ინფორმაცია ქალაქში არსებული მდგომარეობის შესახებ.
„ფინანსთა სამინისტროში დონორთა კონფერენციაზე ჩვენ მათ წარვუდგინეთ ინფორმაცია ქალაქში არსებული მდგომარეობის შესახებ. დონორთა კონფერენციის შემდეგ გადაწყდა, რომ მათ ადგილზე დაეთვალიერებინათ სტიქიის მასშტაბები და თავისი თვალით ენახათ ვითარება. მე მინდა, მადლობა გადავუხადო ორგანიზაციებს, ვინც დაინტერესდა და გამოიჩინა ყურადღება ჩვენს მიმართ“, - განაცხადა დიმიტრი ქუმსიშვილმა.
თბილისის ვიცე-მერის თქმით, შეკრებაზე, რომელსაც 20-მდე ორგანიზაცია ესწრებოდა, დედაქალაქის მოსახლეობის საჭიროებები განიხილეს.
„ჩვენ მათ გავაცანით მოკლევადიანი და გრძელვადიანი საჭიროებები, ასევე, გავაცანით, რა სჭირდება მოსახლეობას. ორ დღეში უნდა დაზუსტდეს სავარაუდო ბიუჯეტები და ამის შემდეგ გადავალთ კონსულტაციების რეჟიმში, თუ რომელი დონორი რა დახმარებას გაგვიწევს“, - განაცხადა დიმიტრი ქუმსიშვილმა.