ესტონელი პროფესორები საქართველოში სტიქიის შედეგად დაზარალებული მოსახლეობის დასახმარებლად საქველმოქმედო აქციის ინიციატივით გამოდიან.
ტალინის ტექნოლოგიური უნივერსიტეტის პროფესორმა, საერთაშორისო ურთიერთობების ფაკულტეტის დეკანმა პიტერ მურსეპმა ესტონეთში საქართველოს ელჩს თეა ახვლედიანს სამძიმრის წერილით მიმართა.
„საქართველო ესტონეთის უახლოესი და ყველაზე ერთგული მეგობარია. ჩვენ ყოველთვის ერთად ვიდექით გაჭირვების ჟამს და წარმატებასა და სიხარულსაც ერთმანეთს ვუზიარებდით. დღეს კი საქართველოს ულამაზესი დედაქალაქი დამანგრეველი წყალდიდობის შედეგებს იმკის. დაიღუპნენ ადამიანები. მოშლილია ქალაქის ნორმალური ცხოვრების რიტმი“- ნათქვამია წერილში, რომელსაც საქართველსოს საგარეო უწყება ავრცელებს.
საქართველოში მომხდარ ტრაგედიასთან დაკავშირებით, თავის კოლეგებსა და მეგობრებს წერილით მიმართა ამავე უნივერსიტეტის პროფესორმა ვლად ვერნიგორამ. წერილში ის მათ საქართველოსთვის მხარდაჭერის მობილიზებისკენ მოუწოდებს.
„ასეთ სიტუაციებში, თითოეულ ევროს უდიდესი მნიშვნელობა ენიჭება“ - წერს ვლად ვერნიგორა საკუთარ მიმართვაში, რომელსაც იგი ესტონელ პროფესორებს უგზავნის.
