გუშინდელმა ძლიერმა წვიმამ და სეტყვამ ხულოს მუნიციპალიტეტის რამდენიმე სოფელს ზიანი მიაყენა. განადგურდა შიდა სასოფლო გზები, ასევე საკარმიდამო ნაკვეთები.
სოფელ ბეღლეთში ზედა საძოვრებიდან წამოსულმა ღვარცოფმა გამოიწვია სოფლის რამდენიმე უბნის (ვაკე, ჩოხელი, ზეგანი) გზის სრული პარალიზება, დანგრეულია მდინარეებზე გადებული ხიდები, დაკარგულია მილები.
აღნიშნულ ფაქტს, ხულოს მუნიციპალიტეტის გამგებლის მოადგილე ნოდარ მიქელაძე ადგილზე მისვლით გაეცნო.
ამ ეტაპზე საავტომობილო გზებისა და სამელიორაციო სისტემების მართვის დეპარტამენტის მიერ მობილიზებულია ტექნიკა. გზებზე უკვე მიმდინარეობს გაწმენდითი სამუშაოები, შრომის პროცესში ჩართულია ადგილობრივი მოსახლეობა.
აღნიშნულთან დაკავშირებით შექმნილია კომისია, მიმდინარეობს ზარალის დათვლა და სტიქიის სალიკვიდაციო სამუშაოები.
