ქალაქ დონეცკის ცენტრში, ე. წ. რესპუბლიკის მეთაურის ოფისთან ასეულობით ადამიანი შეიკრიბა, რომლებიც საომარი მოქმედების შეწყვეტას ითხოვენ.
თვითმხილველების თქმით, მომიტინგეები გამოდიან ლოზუნგებით: ,,შეწყვიტეთ ომი! დაგვიბრუნეთ ჩვენი სახლები. წადით ყველა!”
ამის შესახებ უკრაინული საინფორმაციო სააგენტო ,,უნიანი” იუწყება.
გამოცემის ცნობით, საპროტესტო აქციის მონაწილეები დონეცკში მიმდინარე სროლებში პრორუს სეპარატისტებს ადანაშაულებენ.
მათ დონეცკის ცენტრში არტიომის ქუჩა გადაკეტეს, რის გამოც ტრანსპორტის მოძრაობა შეფერხდა.
შეკრებილების წინააღმდეგ სეპარატისტულ მთავრობას ჯერ-ჯერობით განსაკუთრებული ზომები არ მიუღია, გარდა იმისა, რომ ადგილობრივი პოლიცია მომიტინგეებს და ჟურნალისტებს საბუთებს უმოწმებს.
უკრაინული მედიის თქმით, ეს არის პირველი მასშტაბური მიტინგი, რომელიც ანტისაომარი მოწოდებებით გაიმართა.
სააგენტოს ინფორმაციით, პრორუსი სეპარატისტები აღმოსავლეთ უკრაინის ტერიტორიაზე უკრაინული არმიის პოზიციებისკენ გამუდმებით ისვრიან. ისინი ცეცხლს დასახლებული პუნქტების მიმართულებითაც ხსნიან, რაც მშვიდობიანი მოსახლეობის დაღუპვას და ინფრასტრუქტურის განადგურებას იწვევს.
