სრულიად საქართველოს კათოლიკოს-პატრიარქი უწმინდესი და უნეტარესი ილია მეორე ტაძრების წინამძღვრებს მოუწოდებს, სტიქიის დროს დაზარალებულ ოჯახებზე მზრუნველობა აიღონ.
13 ივნისის მომხდარი სტიქიური უბედურების შედეგებს პატრიარქი სიონის საკათედრო ტაძარში გარდაცვილთა სულის მოსახსენიებელი პანაშვიდის დაწყებამდე ქადაგებისას გამოეხმაურა.
„შევთხოვთ უფალს, ნათელში დაამკვიდროს მათი უკვდავი სულები. დღეს ჩვენ მოვუწოდებთ სრულიად საქართველოს, გაიზიარონ ეს მწუხარება და მიიღონ მონაწილეობა მის განკურნებაში. მინდა მივმართო თბილისის ტაძრებს და წინამძღვრებს, მოძღვრებს, აიღონ მფარველობა თითო ოჯახზე და ყურადღება მიაქციონ მათ გაჭირვების ჟამს“, - ბრძანა პატრიარქმა.
მისივე თქმით, ახალგაზრდობამ გამოიჩინა საოცარი თავდადება და სტიქიის შედეგების აღმოფხვრაში აქტიური მონაწილეობა მიიღო.
„მწუხარება იმედია, რომ სიხარულით შეიცვლება და ჩვენი ხალხი, ხელისუფლება, ეკლესია ყველაფერს გააკეთებს, რათა მსგავსი რამ აღარ განმეორდეს. უნდა იყოს გათვალისწინებული, რაც განვიცადეთ და აქედან უნდა გამოვიტანოთ დასკვნები... ახალგაზრდობამ გამოიჩინა საოცარი თავდადება და გამოვიდა დასახმარებლად. გუშინ გახლდით იმ ადგილებში და ვხედავდი, როგორ შრომობდნენ ისინი“, - აღნიშნა პატრიარმა და ახალგაზრდებს მადლობა გადაუხადა.
გარდაცვლილთა სულის მოსახსენიებელ პანაშვიდს საქართველოს პრეზიდენტი გიორგი მარგველაშვილი, პრემიერ-მინისტრი ირაკლი ღარიბაშვილი და მინისტრთა კაბინეტის წევრები დაესწრნენ.
