2015 წლის 13 ივნისს, ძლიერმა წვიმამ გამოიწვია მდინარე ვერეს და მტკვრის ადიდება, რასაც მოჰყვა წყალდიდობა და ღვარცოფი. სტიქიის შედეგად მნიშნელოვნად დაზიანდა ქალაქი თბილისი და მისი შემოგარენი. განადგურებამდე დაზიანდა თბილისის ცენტრალური უბნები (ვაკე-საბურთალოს რაიონში სვანიძის ქუჩა, ვაკე-საბურთალოს შემაერთებელი გზა, გმირთა მოედანი და მტკვრის მარჯვენა სანაპირო), ასევე ქალაქის შემოგარენი (ლისი, წოდორეთი, ნაფეტვრები, ბევრეთი, წყალდიდი, ბეთანია-წყნეთის შემაერთებელი გზა, ბეთანიის მოპირდაპირედ არსებული თეთრწყაროს მუნიციპალიტეტის სოფლები).
სტიქიაზე რეაგირების მიზნით, საქართველოს წითელი ჯვრის საზოგადოებაში ჩამოყალიბდა სამუშაო ჯგუფი, რომელიც შედგება სხვადასხვა დეპარტამენტის თანამშრომლებისაგან. ბუნებრივ სტიქიაზე რეაგირების სამუშაოებს ხელმძღვანელობს საქართველოს წითელი ჯვრის საზოგადოების გენერალური მდივანი.
შედგა კომუნიკაცია თბილისის მერიის, ვაკისა და საბურთალოს გამგეობების, ჯანდაცვის სამინისტროს, შინაგან საქმეთა სამინისტროს და, ასევე, მასმედიის წარმომადგენლებთან, მოპოვებულ იქნა ინფორმაცია.
საქართველოს წითელი ჯვრის საზოგადოების თანამშრომლებმა და მოხალისეებმა ჩაატარეს სიტუაციური შეფასება, შეხვდნენ დაზარალებულ მოსახლეობას, მოინახულეს მათი სახლები, ჩაატარეს გამოკითხვა და გამოავლინეს ძირითადი საჭიროებები. საქართველოს წითელი ჯვრის საზოგადოებას მუდმივი კომუნიკაცია აქვს ყველა შესაბამის ორგანოსთან და ძირითად პარტნიორებთან, რათა მოხდეს აქტივობების კოორდინაცია. საქართველოს წითელი ჯვრის საზოგადოების მოხალისეები დაზარალებულ მოსახლეობას უწევენ პირველ დახმარებასა და ფსიქოლოგიურ მხარდაჭერას. ამავდროულად, საქართველოს წითელი ჯვრის საზოგადოება ახორციელებს რესურსების მობილიზებას დაზარალებული მოსახლეობის დასახმარებლად (სასმელი წყალი, საკვები და არასაკვები პროდუქტი, ჰიგიენური საშუალებები).
საქართველოს წითელი ჯვრის საზოგადოება აქვეყნებს ანგარიშის ნომერს: GE91BG0000000683916102 დაზარალებული მოსახლეობისთვის ფულადი შემოწირულობების მიზნით და მოუწოდებს როგორც ქვეყანაში, ისე მის ფარგლებს გარეთ მცხოვრებ მოსახლეობას ქველმოქმედების გასაწევად.
გთხოვთ, დამატებითი ინფორმაციისთვის დაუკავშირდეთ სწჯს-ის რესურსების მობილიზების ოფიცერს, მარიამ ბექურიძეს ტელ.: 599923392.