სპეციალისტები შეისწავლიან, იმ შემთხვევაში, თუ ამაღამ ისეთივე წვიმა მოვა, როგორც გუშინ, იგივე ხომ არ განმეორდება, - ამის შესახებ რეგიონული განვითარებისა და ინფრასტრუქტურის მინისტრმა ნოდარ ჯავახიშვილმა განაცხადა.
მისი თქმით, გეოლოგები აკვირდებიან ვერეს მიმდებარე ტერიტორიას, მათ 24-საათიანი მორიგეობა აქვთ, საშიშროება თუ იქნება და წყლის დაგროვება დაიწყება, პატარ-პატარა აფეთქებებით წყალს გამოუშვებენ.
„არ ვიცით, ეს მეწყერული მოვლენაა თუ პლასტების გადანაცვლება, მთელი მთა არის მოხსნილი. უზარმაზარი მთა წყალმა ჩამოიტანა და მიწის და ხეების უზარმაზარი რაოდენობა ვერეში ჩაიტანა და გადაკეტა, რამაც შუაღამისას სერიოზული მოცულობის წყლის დაგროვება გამოიწვია.
მთავარი უბედურება ტალღის დარტყმა იყო, ვერე რომ არ გადაკეტილიყო, ვფიქრობ, ეს წყალდიდობა მსგავს ზიანს არ მოგვიტანდა. სპეციალისტები უფრო დეტალურად შეისწავლიან, ამაღამ რომ მოვიდეს ასეთივე წვიმა, იგივე შემთხვევა ხომ არ მოხდება. 24 საათიანი მორიგეობა იქნება და მოხდება აფეთქებები“, - განაცხადა ჯავახიშვილმა.
