სენაკს წყალმომარაგება აღუდგა, ფოთის მოსაცლეობა კი დღის პირველ ნახევარში შეძლებენ წყლის მიღებას. როგორც ,,ჯი-ეიჩ-ენს” რეგიონული განვითარებისა და ინფრასტრუქტურის სამინისტროდან აცნობეს, გაერთიანებული წყალმომარაგების კომპანიის თანამშრომლებთან ერთად, ფოთისა და სენაკის მოსახლეობის წყალმომარაგების აღდგენის მიზნით, მთელი ღამის განმავლობაში უწყვეტ რეჟიმში მუშაობდნენ, რის შედეგადაც, ამ დროისათვის, სრულად არის აღდგენილი ქალაქ სენაკის წყალმომარაგება.
რაც შეეხება ფოთის მოსახლეობას, ისინი სასმელი წყლის მიღებას დღის პირველ ნახევარში შეძლებენ. წყალმომარაგების შეფერხება სენაკის მუნიციპალიტეტის სოფელ ნოსირში ძლიერი ქარის მიერ მაღალი ძაბვის ელექტროგადამცემი ანძის დაზიანებამ გამოიწვია, რის გამოც ელექტრო - ენერგიის მიწოდება შეუწყდა ფოთისა და სენაკის წყალსადენის სათავე ნაგებობებს. საქართველოს გაერთიანებულმა წყალმომარაგების კომპანიამ ხარვეზების აღმოსაფხვრელად საჭირო სამუშაოები დაუყოვნებლივ დაიწყო.
