დედაქალაქის მუნიციპალიტეტის საკრებულოს მთაწმინდის რაიონის მაჟორიტარი დეპუტატი ჯაბა ჯიშკარიანი, ამავე რაიონის გამგებელთან გელა არჩვაძესთან, გამგებლის მოადგილეებსა და მაჟორიტარის ბიუროს წარმომადგენლებთან ერთად ბერიძის, ჩიტაძისა და ინგოროყვას ქუჩის მოსახლეობას შეხვდა და რაიონში არსებულ პრობლემებს ადგილზე პირადად გაეცნო.
დეპუტატის განცხადებით, მთაწმინდის რაიონში სხვადასხვა სახის პრობლემებია, თუმცა, მისივე თქმით, ყველაზე ხშირად მოქალაქეები დეპუტატს ავარიული ნაგებობების გამაგრებისა და რეაბილიტაციის თხოვნით მიმართავენ.
„მთაწმინდის რაიონში მწვავედ დგას ძველი და ავარიული შენობების პრობლემა. მოგეხსენებათ, აქ უამრავი ასეთი სახლია და მათ შორის ზოგიერთი კულტურული ძეგლის მემკვიდრეობის სტატუსის მქონეა.
დღეს ასეთი რამდენიმე ნაგებობა, მათ შორის ბერიძის ქუჩის N11/4-ში მდებარე სახლი მოვინახულეთ, რომელიც გამაგრებითი სამუშაოების ჩატარებას საჭიროებს’’,-განაცხადა ჯაბა ჯიშკარიანმა.
მისივე ინფორმაციით, რაიონის გამგებელთან და გამგებლის მოადგილეებთან ერთად მიღებული გადაწყვეტილების თანახმად, მსგავსი საკითხების გონივრულ ვადაში გადაჭრის მიზნით, ასეთი პრობლემის თაობაზე მერიის არქიტექტურის საქალაქო სამსახურს უნდა მიემართოს.
,,შესაბამისი ღონისძიებების გატარების შემდეგ კი რაიონის გამგეობა ბინათმესაკუთრეთა ამხანაგობების პროგრამის ფარგლებში, აღდგენით და გამაგრებით სამუშაოებს დაიწყებს“,-განაცხადა დეპუტატმა.