თბილისის მერის დავით ნარმანიას ინფორმაციით, ძლიერი წვიმის შედეგად დედაქალაქისათვის მიყენებული ზარალი ძალიან დიდი არ არის. ამის შესახებ მან სპეციალურ თათბირზე განაცხადა, რომელიც სტიქიის შედეგებთან საბრძოლველად დღეს თბილისის მერიაში დაინიშნა.
„ძალიან დიდი ზიანი არ არის, თუმცა ზიანი არის და ეს მეტ-ნაკლებად ფინანსურ მაჩვენებლებშიც უნდა ავსახოთ, დავითვალოთ, რათა შესაბამისად გავანაწილოთ,“ - განაცხადა მერმა.
მან კეთილმოწყობის სამსახურს სანიაღვრე ქსელების, დაზიანებული გზის მონაკვეთების და ქვაფენილების სწრაფ რეჟიმში აღდგენა დაავალა.
კეთილმოწყობის სამსახურის უფროსის ინფორმაციით, არსად არ არსებობს გადაადგილების პრობლემა ამ დროისთვის. ზარალი ჯერჯერობით დათვლილი არ არის.
„ჩვენ გუშინ რომ ფორსმაჟორულ რეჟიმში ვიყავით და შესაბამისად, ამისთვის არ გვეცალა. თუმცა, აუცილებლად თითოეულ სამუშაოს აღვწერთ და ზარალის შესახებ მოგვიანებით იქნება ცნობილი,“ - განაცხადა ავთანდილ სუდაძემ.
წუხელ, თითქმის ერთსაათიანმა ძლიერმა წვიმამ და ქარმა პრობლემები შეუქმნა დედაქალაქს. თბილისში რამდენიმე ქუჩა დაიტბორა.
