"სამოქალაქო ჩართულობის ცენტრი" პარლამენტს დეპუტატ გივი თარგამაძისთვის "ნდობის ჯგუფის" წევრის უფლებამოსილების შეწყვეტისკენ მოუწოდებს.
ორგანიზაციის ინფორმაციით, "სამოქალაქო ჩართულობის ცენტრის" მიერ 2015 წლის მარტში ჩატარებულმა კვლევამ, რომელიც საქართველოს მე-8 მოწვევის პარლამენტის საქმიანობის მონიტორინგს შეეხებოდა, აჩვენა, რომ საქართველოს პარლამენტის "ნდობის ჯგუფის" წევრ გივი თარგამაძის 2012 წლიდან 2015 წლის მაისამდე საქმიანობა (კვლევის პერიოდი) გამოირჩევა საქართველოს პარლამენტის სხდომების საპატიო თუ არასაპატიო გაცდენათა რაოდენობის სიხშირით.
2012 წლის ოქტომბრიდან 2015 წლის თებერვლის ჩათვლით გივი თარგამაძემ პარლამენტის 50 სხდომა საპატიო, ხოლო 14 სხდომა არასაპატიო მიზეზით გააცდინა. ამასთან, კვლევის თანახმად, გივი თარგამაძეს მე-8 მოწვევის პარლამენტის საქმიანობის ფარგლებში არც ერთი საკანონმდებლო ინიციატივა არ წარმოუდგენია, რაც ორგანიზაციის მოსაზრებით, მისი, როგორც პარლამენტის საპასუხისმგებლო ჯგუფის წევრის პასიურობას უსვამს ხაზს.
"სამოქალაქო ჩართულობის ცენტრმა" მაისში ისაუბრა გივი თარგამაძის მიერ პარლამენტის "ნდობის ჯგუფის" დატოვების აუცილებლობაზე, როდესაც ერთ-ერთი მასმედიის საშუალებით გავრცელებული ინფორმაციის თანახმად, შინაგან საქმეთა სამინისტროს თანამშრომელმა, სავარაუდოდ, სამსახურებრივი უფლებამოსილების გადამეტების გზით მოიპოვა პოლიციელის თარაშ მუკბანიანის განზრახ მკვლელობაში ბრალდებული რამაზ დევაძის საზღვრის კვეთის ამსახველი ვიდეომასალა, რაც შემდგომ მან პარლამენტის წევრ გივი თარგამაძეს გადასცა, რომელმაც, თავის მხრივ, აღნიშნული ინფორმაცია "ნდობის ჯგუფის" ფარგლებში მოპოვებულად დაასახელა. ფაქტობრივი მონაცემები ქმნის ეჭვის საფუძველს, რომ პარლამენტის წევრის მიერ მიზანმიმართულად მოხდა მცდარი ინფორმაციის გავრცელება, რაც საზოგადოების შეცდომაში შეყვანას ისახავდა მიზნად", - აცხადებენ "სამოქალაქო ჩართულობის ცენტრში".
მათივე ინფორმაციით, დღევანდელი მდგომარეობით, პარლამენტის "ნდობის ჯგუფის" შემადგენლობაში შედიან: გივი თარგამაძე, ირაკლი სესიაშვილი, ზურაბ აბაშიძე, დავით საგანელიძე, ზვიად ძიძიგური.
კვლევის შედეგებმა აჩვენა, რომ "ნდობის ჯგუფის" არც ერთ სხვა წევრს გაცდენების კუთხით არ აქვს ისეთი ნეგატიური მაჩვენებელი, როგორც ეს გივი თარგამაძის შემთხვევაშია სახეზე.
"აღსანიშნავია, რომ აღნიშნული ინსტიტუტი წარმოადგენს იმ პირთა ჯგუფს, რომლებსაც მიუწვდებათ ხელი სახელმწიფო საიდუმლო ინფორმაციაზე, რაც თავისი არსით მნიშვნელოვანად აძლიერებს ამ პირთა პასუხისმგებლობას. თარგამაძის საქმიანობიდან გამომდინარე მისი სახელმწიფო საიდუმლოებასთან წვდომის საკითხის ეჭვქვეშ დაყენებისა და კანონით გათვალისწინებული საპარლამენტო საქმიანობის მიმართ უპასუხისმგებლო დამოკიდებულების გათვალისწინებით, "სამოქალაქო ჩართულობის ცენტრი" კიდევ ერთხელ მოუწოდებს საქართველოს საკანონმდებლო ორგანოს შესაბამისი ზომების მიღებისკენ და გივი თარგამაძისთვის "ნდობის ჯგუფის" წევრის უფლებამოსილების შეწყვეტისკენ", - ნათქვამია "სამოქალაქო ჩართულობის ცენტრის" მიერ გავრცელებულ განცხადებაში.