აშშ-ში საქართვლოს საელჩომ საქართველოს
დამოუკიდებლობის დღე აღნიშნა. ღონისძიებაზე დამსწრე სტუმრებს სიტყვით მიმართეს აშშ-ში საქართველოს საგანგებო და სრულუფლებიანმა ელჩმა, არჩილ გეგეშიძემ და საპატიო სტუმრებმა.
მიღებას ესწრებოდა 600-ზე მეტი სტუმარი, მათ შორის, აშშ-ის აღმასრულებელი და საკანონმდებლო ორგანოს წევრები, ვაშინგტონში აკრედიტებული სხვა ქვეყნების საელჩოების წარმომადგენლები, აკადემიური სფეროს მოღვაწეები, საქართველოს ამერიკელი მეგობრები და აშშ-ის ქართული დიასპორის წევრები.
საქართველოს ელჩმა მადლობა გადაუხადა სტუმრებს მობრძანებისათვის და ქვეყნის დამოუკიდებლობისა და საქართველო-აშშ-ის თანამშრომლობის მნიშვნელობაზე ისაუბრა.
ღონისძიების საპატიო სტუმარმა, აშშ-ის საზღვაო ძალების მდივანმა, რეი მეიბუსმა თავის სიტყვაში ყურადღება გაამახვილა საერთაშორისო სამშვიდობო ოპერაციებში საქართველოს მიერ გაწეულ მნიშვნელოვან წვლილზე.
ნიუ-იორკის შტატის დემოკრატი კონგრესმენი ენგელი, თავის გამოსვლაში, საქართველოს ნატოში გაწევრიანების საკითხს შეეხო და აღნიშნა, რომ მისი ნებით, ალიანსის წინაშე არსებული დამსახურებების გამო, საქართველო ალიანსის წევრი ქვეყანა დიდი ხნის წინ გახდებოდა.
ოფიციალური ცერემონიის ბოლოს, აშშ-ში ქართული კინოს პოპულარიზაციის და ქართული ფილმების რეტროსპექტივის ორგანიზების საქმეში შეტანილი განსაკუთრებული წვლილისათვის საქართველოს ელჩმა ღირსების ორდენები გადასცა Berkley-ის ხელოვნების მუზეუმისა და Pacific Film-ის არქივის ფილმების კურატორს, სუზან ოქსტობის და ეროვნული გალერეის ფილმების დეპარტამენტის დირექტორს, მარგარეტ პარსონს. MoMa-ს ფილმების დეპარტამენტის კურატორისათვის, ჯიტ ჯენსისათვის (რომელიც ერთი თვის წინ გარდაიცვალა) განკუთვნილი ღირსების ორდენი გადაეცა MoMa-ს წარმომადგენელს, დენიელ ხერსს.
საღამოზე საქართველოსა და ამერიკის შეერთებული შტატების ჰიმნები შეასრულეს თბილისიდან საგანგებოდ ჩამოსულმა თეატრალურმა კვარტეტმა და ანსამბლმა “ალილომ”. ღონისძიებაზე გაიმართა ნიუ-იორკში მოღვაწე ქართველი ჯაზის მუსიკოსის, გიორგი მიქაძის ჯგუფის კონცერტი