ბანკი „რესპუბლიკა“ განაგრძობს სოლიდარობისა და პატრონაჟის პროექტების განხორციელებას. 3 ივნისს ბანკმა მრავალშვილიანი და მარჩენალდაკარგული ოჯახები მარჯანიშვილის თეატრში, სპექტაკლის „თამაში მაგიდასთან“ სანახავად მიიწვია. ბავშვებმა და მათმა მშობლებმა ისიამოვნეს სპექტაკლით თეატრის ატმოსფეროთი. მათ მისასალმებელი სიტყვით მიმართა რეჟისორმა ბესო კუპრეიშვილმა. სპექტაკლის დასრულების შემდეგ ბავშვები ესაუბრნენ მსახიობებს და მათთან ერთად გადაიღეს სამახსოვრო ფოტოები.
„დღეს ჩვენი დიდი ხნის პარტნიორი მარჯანიშვილის თეატრი ჩვენს მეგობრებს მასპინძლობდა. ვფიქრობ, ეს ჩვენი ახალგაზრდა მეგობრებისთვის დასამახსოვრებელი დღე იყო. ეს ოჯახები ჩვენს ყოველწლიურ საქველმოქმედო პროგრამაში არიან ჩართული. სასიხარულოა, რომ დღეს ბავშვები ინტერესით უყურებდნენ სპექტაკლს. ვცდილობთ, მატერიალურ დახმარებასთან ერთად, სამომავლოდ მათი უნარების განვითარებასაც შევუწყოთ ხელი. ბანკ „რესპუბლიკას“ სოციალური პასუხისმგებლობის გრძელვადიანი ხედვა აქვს, რომლის განხორციელებაც რესურსების მობილიზაციითაა შესაძლებელი”, აცხადებს ბანკის კორპორაციული კომუნიკაციის დეპარტამენტის ხელმძღვანელი თეიკო კანდელაკი.
სოციალური პასუხისმგებლობა ბანკ „რესპუბლიკის“ საქმიანობის მნიშვნელოვანი ნაწილია. ბანკი ცდილობს, განათლებისა და კულტურის გზით სხვადასხვა სირთულის მქონე ადამიანების საზოგადოებაში ინტეგრაციას და მათი უნარების რეალიზაციას შეუწყოს ხელი. ამ მიზნით, ბანკი ახორციელებს გრძელვადიან საქველმოქმედო პროექტებს, მათ შორის მრავალშვილიანი, მარჩენალდაკარგული და სიღარიბის ზღვარს ქვემოთ მცხოვრები ოჯახების, საქართველოს სხვადასხვა რეგიონში მდებარე სპეციალური სკოლების, ასევე, ინვალიდების, ხანდაზმულებისა და სოციალურად დაუცველთა დახმარების პროექტებს.