ქვემო ქართლში, ბოლნისში მუნიციპალური ნაგავსაყრელის კეთილმოწყობა დასრულდა. ჩატარებული სამუშაოები დღეს რეგიონული განვითარებისა და ინფრასტრუქტურის სამინისტროს მყარი ნარჩენების მართვის კომპანიის დირექტორმა გიორგი შუხოშვილმა ბოლნისის მუნიციპალიტეტის გამგებელ გოგი მეშველიანთან და ადგილობრივი თვითთმართველობის წარმომადგენლებთან ერთად დაათვალიერა. ბოლნისის მუნიციპალური ნაგავსაყრელის ფართობი 50316.34 მ² შეადგენს. პოლიგობზე ყოველდღიურად დაახლოებით ბოლნისის მუნიციპალიტეტიდან და მისი მიმდებარე სოფლებიდან 16 მ³ ნარჩენი შედის.
ბოლნისის მუნიციპალური ნარჩენების ნაგავსაყრელი „საქართველოს მყარი ნარჩენების მართვის კომპანიას“ საკუთრებაში 2013 წლის 10 ივლისი გადაეცა. იმ დროისთვის ნაგავსაყრელზე არსებული მდგომარეობა უკიდურესად მძიმე იყო: ნარჩენების შეტანა ხდებოდა არაორგანიზებულად და ვერ აკმაყოფილებდა ეკოლოგიურ და სანიტარულ ნორმებს. “საქართველოს მყარი ნარჩენების მართვის კომპანიამ,” საქართველოს რეგიონული განვითარებისა და ინფრასტრუქტურის სამინისტროს კოორდინაციით, ბოლნისის მუნიციპალიტეტის ნაგავსაყრელზე, კეთილმოწყობის მიზნით, სამშენებლო-სამონტაჟო სამუშაოები ჩაატარა, რომლის ფარგლებშიც პოლიგონის შიდა გზები და წყალარინების არხები მოეწყო. შემოიღობა ტერიტორია, დამონტაჟდა ნაგავსაყრელის მაჩვენებელი ბანერები და ამკრძალავი ნიშნები. ასევე, მოხდა ტერიტორიის ელექტრიფიცირება. ნაგავსაყრელის კეთილმოწყობის პროექტის ღირებულებამ შეადგინა 317 600 ლარი.
