საქართველოს პრეზიდენტი გიორგი მარგველაშვილი ბავშვებს, ბავშვთა დაცვის საერთაშორისო დღეს ულოცავს.
,,ძვირფასო ბავშვებო, გულითადად გილოცავთ ბავშვთა საერთაშორისო დღეს.
ამ დღეს გილოცავთ მშობლებს, საბავშვო ბაღებისა და სკოლების პედაგოგებს - ყველას, ვინც ცხოვრება მომავალი თაობების აღზრდას დაუკავშირეთ.
ბავშვები ჩვენი მომავლის ყველაზე თვალსაჩინო განსახიერებაა. როგორც ვიზრუნებთ მათზე, ისეთი იქნება ჩვენი ხვალინდელი დღე. ჩვენ ყველას გვაკისრია პასუხისმგებლობა შევქნათ იმგვარი გარემო, სადაც ჩვენი შვილები სრულფასოვნად გაიზრდებიან და ღირსეულ, პროფესიონალ, პატრიოტ მოქალაქეებად ჩამოყალიბდებიან. ყველა ბავშვისთვის ხელმისაწვდომი უნდა გავხადოთ კარგი ჯანდაცვა და განათლება, სათანადო სოციალური პირობები.
ჩემთვის, როგორც პრეზიდენტისა და მოქალაქისთვის, რთულია შევინარჩუნო სადღესასწაულო განწყობა, როდესაც ვიცი, რომ ათასობით ბავშვი ჩვენ ქვეყანაში ჯერაც უკიდურეს სიღარიბეში ცხოვრობს.
არსებობს შვედური გამოთქმა: ‘ყველა ბავშვი - ყველას ბავშვია’. ვისურვებდი, რომ სწორედ ასეთი განწყობით მივუდგეთ ყველა - ხელისუფლება, სამოქალაქო საზოგადოება, კერძო სექტორი - გამოწვევას, რომელიც ჩვენი მომავლის სახელით დაუყოვნებლივ გადაჭრას ითხოვს.
ბედნიერებას, ჯანმრთელობას, კეთილდღეობასა და მშვიდობას ვუსურვებ ჩვენ შვილებს”, - აღნიშნულია განცხადებაში.