ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის სოზარ სუბარის განცხადებით, დევნილებისთვის, ბოლონ ორწელიწადნახევარში ძალიან ეფექტური პროგრამები ხორციელდება.
პარლამენტის ადამიანის უფლებათა დაცვის კომიტეტის სხდომაზე, უწყების ანგარიშის წარდგენისას სუბარმა განაცხადა, რომ წინა ხელისუფლებამ 2009 წელს მიიღო დადგენილება, რომლითაც დევნილისთვის თბილისში ბინის მიცემა აიკრძალა.
,,ჩვენ ეს გავაუქმეთ და წელს პირველად, დევნილებს თბილისში 1000-მდე სახლი გადაეცემათ. ძალიან ეფექტურია "სოფლის სახლის" პროგრამა, რომელიც გულისხმობს იმას, რომ დევნილები თვითონ პოულობენ სახლებს და ჩვენ მას ვუფინანსებთ. ასეთ სახლებს ახლავს მიწა და დევნილებს აქვთ შემოსავლის წყაროც. ჩვენ ასევე ვმუშაობთ ბინათმენაშეებისგან ბინების გამოსყიდვაზე – ეს ერთი მხრივ, ნიშნავს დევნილთა ინტეგრაციას, რადგან ისინი იცხოვრებენ არა ცალკე, არამედ დანარჩენ ქართულ საზოგადოებასთან ერთად. ხშირ შემთხვევაში, აქ საუბარია 2008 წლის კრიზისის შემდეგ გაჩერებულ მშენებარე სახლებზე. ჩვენი პროგრამა მენაშენეებს აძლევს შანსს, გააგრძელონ მშენებლობა, განავითარონ ბიზნესი და შანსს აძლევს ადამიანებს, ვისაც მშენებლობაში წლების წინ ფული ჰქონდათ ჩადებული, ხოლო ბინა დაკარგული ჰქონდათ, ბინები დაიბრუნონ", - აცხადებს სოზარ სუბარი.
მისივე ცნობით, ხორციელდება დევნილებისთვის იმ ბინების გამოსყიდვა, სადაც ისინი წლებია ცხოვრობენ და კერძო საკუთრებაში ვერ გადაეცემოდათ.