„საქართველოში ადამიანის უფლებათა და თავისუფლებათა დაცვის მდგომარეობა: მიღწევები და გამოწვევები“ - ამ სახელწოდებით მიმდინარეობს საჯარო დებატები სახალხო დამცველის ორგანიზებით სასტუმრო „ქორთიარდ მარიოტში“ , რომელსაც პრეზიდენტიც ესწრება.
დებატების დაწყებამდე უჩა ნანუაშვილმა ჟურნალისტებთან განაცხადა, რომ შეხვედრაზე საუბარი იქნება შედეგებზე, რომელიც ქვეყანაში ადამიანის უფლებათა დაცვის თვალსაზრისით არსებობს.
„ერთ-ერთი მთავარი გამოწვევა და რეკომენდაცია მაინც საგამოძიებო ორგანოებს ეხება. ზოგადად, სამართალდამცავი ორგანოების საქმიანობას და რა თქმა უნდა, ამ მიმართულებით ვაგრძელებთ მუშაობას. პრობლემები რეალურად ფიქსირდება ამ მიმართულებით, ქალთა მიმართ ძალადობის ფაქტების და გახშირებული სტატისტიკა სამწუხარო ტენდენციად ჩამოყალიბდა და ყველა გამოწვევაზე გვექნება საუბარი, რომელიც ქვეყანას აწუხებს“, - განაცხადა უჩა ნანუაშვილმა. მისივე თქმით, დღეს კიდევ ერთი შესაძლებლობაა, რომ ანგარიშზე დებატები ახლა უკვე პრეზიდენტთან ერთად გაიმართოს.
გასულ დღეებში, სახალხო დამცველმა ანგარიში საკანონმდებლო ორგანოს წარუდგინა.