აფხაზეთის მთავრობის თავმჯდომარე გალის რაიონში დამატებითი სამხედრო ძალების შეყვანას შესაძლო სამხედრო ესკალაციას უკავშირებს და ოკუპირებულ ტერიტორიაზე რუსული სამხედრო ძალების მობილიზებას საგანგაშო ტენდენციას უწოდებს.
გიორგი ბარამიამიას ინფორმაციით გალის რაიონის სოფელ ჭუბურხინჯსა და საბერიოში 500-მდე ერთეული მძიმე ტექნიკა შეიყვანეს. მთელი ღამის განმავლობაში მიმდიანრეობდა მათი გადაადგილება "ენგურჰესის" მიმართულებით. "ასევე, რამდენიმე დღის წინ, გალის რაიონის სოფელ მეორე ოტობაიაში რუსული ქვედანაყოფის 350 კაციანი სამხედრო დაჯგუფება იქნა შეყვანილი, რასაც აფხაზების მხრიდანაც შეშფოთება მოყვა. ყოველივე ამის ფონზე სამხედრო ესკალაცია გამორიცხული არ არის" - აღნიშნა ბარამიამ.
მისივე განცხადებით, ფიჩორში, ოტობაისა და თაგილონში ინტენსიურად მიმდინარეობს სამხედრო ბაზისა და სამხედრო პერსონალის ოჯახებისათვის საცხოვრებელი ხუთსართულიანი კორპუსების მშენებლობა.
აფხაზეთის მთავრობის თავმჯდოამრე აფხაზურ ოპოზიციურ ძალებს შორის მწვავე დაპირისპირებაზეც საუბრობს და წინასაარჩევნო პოლიტიკურ ვითარებას საკმაოდ დაძაბულად აფასებს. "რამდენიმე დღის წინ, ე.წ პოლიტიკურ ძალებს შორის გარკვეული უთანხმოება მოხდა, რომელიც ფიზიკურ დაპირისპირებაშიც გადაიზარდა. ნათელია, რომ აფხაზეთში პოლიტიკური სიტუაცია დღითიდღე იძაბება. რუსეთმა აფხაზეთის ტერიტორია სამხედრო პოლიგონად აქცია. გალის რაიონში ამ რაოდენობის სამხედრო ძალების დემონსტრირება კი პროვოკაციების ალბათობას ზრდის" - აცხადებს გიორგი ბარამია.
აფხაზეთის მთავრობის თავმჯდომარე საერთაშორისო ორგანიზაციებს ქმედითი ნაბიჯების გადადგმისა და საერთაშორისო ბერკეტების ამოქმედებისაკენ მოუწოდებს, რათა შექმნილი ვითარება სამხედრო ესკალაციაში არ გადაიზარდოს.
