საქართველოს კათოლიკოს-პატრიარქი, უწმინდესი და უნეტარესი ილია მეორე მრევლს მეფუტკრეობით დაინტერესებისკენ მოუწოდებს. როგორც პატრიარქმა საკვირაო ქადაგებისას ბრძანა, საპატრიარქო დიდი ხანია ფიქრობს, როგორ დაეხმაროს ხალხს და გადაწყდა, რომ სამების ახალგაზრდულ ცენტრში მეფუტკრეობის კოლეჯი გაიხსნას, რადგან ეს საქმიანობა მადლიანი და შემოსავლიანია.
,,გამოცდილი ადამიანებისგან მომისმენია, რომ სცადეს მესაქონლეობა, მეღორეობა, მეცხვარეობა, მეფრინველეობა, მაგრამ ყველაზე სასარგებლო მეფუტკრეობა ყოფილა, ადვილი და შემოსავლიანი. ამასთან დაკავშირებით, ჩვენთან, სამებაში ახალგაზრდულ ცენტრში მეფუტკრეობის კოლეჯი იხსნება. სასწავლებელი რამდენიმეთვიანი იქნება, გააჩნია, ვინ როგორ აითვისებს. ზოგმა შეიძლება ეს საქმიანობა 1-2 თვეში აითვისოს, ზოგს შეიძლება ერთი წელიწადი დასჭირდეს. მეფუტკრეობა საოცარი და მადლიანი საქმეა – თაფლსაც იძლევა, სანთელსაც იძლევა და ჯანმრთელობასაც იძლევა. ვისაც გაინტერესებთ, შემოიტანეთ განცხადება და დაიწყებს სწავლას. ლექციებს და პრაქტიკულ საქმიანობას შეასწავლიან გამოცდილი მეფუტკრეები, რომელთაც აქვთ მრავალი წლის გამოცდილება. თქვენ იქნებით ბედნიერი, უზრუნველყოფილი გექნებათ ცხოვრება და ოჯახის ყოფა", - აღნიშნა პატრიარქმა.
მან ასევე ისაუბრა შრომის მნიშვნელობაზე და განაცხადა, რომ ადამიანი შრომას გადაეჩვია.
,,ძალიან ხშირად გვესმის: საქმე არ მაქვს, სამსახური არ მაქვს, სინამდვილეში არ არის შეჩვეული შრომას. ადამიანმა უნდა იფიქროს, რა გააკეთოს. ჩვენ გადავეჩვიეთ შრომას, ინტელექტუალურ შრომას, გონებრივ შრომას, ფიზიკურ შრომას. გვინდა ყველაფერი შრომის გარეშე მოვიდეს. ეს არ არის სწორი. წმინდა მამები ყოველთვის ფიქრობდნენ, როგორ ეცხოვრათ. მაგალითად, წმინდა მამები უდაბნოში მიდიოდნენ და იქაც კი ფიქრობდნენ, როგორ ეცხოვრათ", - აღნიშნა ქადაგებისას ილია მეორემ.