ფინეთში საქართველოს საგანგებო და სრულუფლებიანი ელჩი კონსტანტინე ქავთარაძე ჰელსინკში ქართული სამზარეულოს პრეზენტაციას დაესწრო.
საგარეო საქმეთა სამინისტროს პრესსამსახურის ინფორმაციით, ჰელსინკის ცენტრში რესტორნების საერთაშორისო დღის ფარგლებში, მსოფლიოს სხვადასხვა სამზარეულოს გვერდით ქართული სამზარეულოც იყო წარმოდგენილი. ღონისძიების სტუმრებს ქართული კერძების დაგემოვნების საშუალება ჰქონდათ.
ქართული კუთხის სტუმრებს შორის იყვნენ ტურისტული ოპერატორები და გიდების ასოციაციის წევრები, საქართველოში ევროკავშირის სადამკვირვებლო მისიის (EUMM) ყოფილი თანამშრომლები, რომლებიც კარგად იცნობენ საქართველოს.
რესტორნებისა და სამზარეულოს საერთაშორისო დღე ჰელსინკიში ყოველწლიურად იმართება. ეს ღონისძიება სხვადასხვა ქვეყნის სამზარეულოს პოპულარიზაციას ისახავს მიზნად. ამ დღეს ფინეთში მცხოვრებ სხვადასხვა ეთნიკურ ჯგუფებს შესაძლებლობა ეძლევათ ლიცენზიებისა და სპეციალური ნებართვების გარეშე ჰელსინკის რესტორნებში მოაწყონ ეროვნული სამზარეულოს პრეზენტაცია-გაყიდვა და უმასპინძლონ სტუმრებს.
ღონისძიებაში რეგულარულად იღებს მონაწილეობას ფინეთში მცხოვრები ჩვენი თანამემამულე, აფხაზეთიდან ლტოლვილი, ვლადა ხარატიშვილი, რომელიც, თავის ფინელ მეგობრებთან ერთად საქველმოქმედო ორგანიზაციიდან MAPA, უკვე მეოთხე წელია ჰელსინკის სხვადასხვა რესტორანში აწყობს ქართული სამზარეულოს კუთხეს. აღსანიშნავია, რომ ბოლო წლებში MAPA"-მ საქართველოში, კერძოდ, ქ. გორში, განახორციელა რამდენიმე მცირე პროექტი იძულებით გადაადგილებული პირების დასახმარებლად.
