საქართველოს პარლამენტის თავმჯდომარის პირველი მოადგილე მანანა კობახიძე, 19 მაისს, ლატვიის დედაქალაქ რიგაში გაემგზავრება.
პარლამენტის პრესსამსახურის ინფორმაციით, მანანა კობახიძე მონაწილეობას მიიღებს და სიტყვით გამოვა კონფერენციაზე სახელწოდებით: "პროგრესი და შესაძლებლობები - ევროკავშირი-საქართველოს ასოცირების დღის წესრიგის მონიტორინგი".
ღონისძიება ეძღვნება საქართველოს მიერ ევროკავშირთან ასოცირების დღის წესრიგის შესრულების პროცესს და მის შეფასებას საქართველოს სამოქალაქო სექტორის მხრიდან.
"ქართული არასამთავრობო ორგანიზაციების, პარლამენტის წევრებისა და მთავრობის წარმომადგენლების გარდა, კონფერენციაზე მიწვეულნი არიან ევროკომისიის, ევროპარლამენტისა და სხვადასხვა ევროპული კვლევითი ორგანიზაციის წარმომადგენლები.
მნიშვნელოვანია, რომ ღონისძიება იმართება აღმოსავლეთ პარტიორობის რიგის სამიტის პერიოდში, რაც საშუალებას მისცემს ქართულ დელეგაციას, კიდევ ერთხელ დაადასტუროს ქართული სახელმწიფოსა და საზოგადოების სწრაფვა ევროპულ ოჯახში გაერთიანებისკენ", - აცხადებენ პარლამენტის პრესსამსახურში.
ღონისძიების ორგანიზატორები არიან: "საერთაშორისო გამჭირვალობა - საქართველო" და ფონდი - "ღია საზოგადოება - საქართველო.
