ჰომოფობიასთან და ტრანსფობიასთან ბრძოლის საერთაშორისო დღესთან დაკავშირებულმა ღონისძიებამ მშვიდ ვითარებაში ჩაირა.
თბილისში, ვაკეში მდებარე მრგვალ ბაღში 19 არასამთავრობო ორგანიზაციის მიერ ორგანიზებული ღონისძიება გაიმართა. აქციის მონაწილეების მიერ გამოტანილ ტრანსფარანტებზე 2012 წლის, 17 მაისის საქმეზე სტრასბურგის სასამართლოს გადაწყვეტილებიდან ამონარიდები იყო მიწერილი.
შეგახსენებთ, ადამიანის უფლებათა ევროპულმა სასამართლომ 2012 წლის 17 მაისის საქმეზე საბოლოო განაჩენი გამოიტანა. განაჩენის თანახმად, 14 პირს საერთო ჯამში, სახელმწიფომ 32 000 ევრო უნდა აუნაზღაუროს, ხოლო ორგანიზაცია „იდენტობის“ სასარგებლოდ, 1 500 ევრო უნდა გადაიხადოს. ევროსასამართლოში ყველა განაცხადი 2012 წლის 3 და 5 ივლისის პერიოდში შევიდა, რომლითაც დაზარალებულები სისხლის სამართლის საქმის აღძვრას იმ მოქალაქეების წინააღმდეგ ითხოვდნენ, რომლებიც მათ თავს დაესხნენ. 2012 წლის 17 მაისს, ლგბტ პირების და უფლებადამცველი ორგანიზაციების მიერ, რუსთაველის გამზირზე, ჰომოფობიის წინააღმდეგ გამართულ აქციას დაპირისპირება მოყვა.
ინციდენტების თავიდან აცილების მიზნით, მრგვალ ბაღთან პოლიცია იყო მობილიზებული.
